الحلقة الأولى

الله يسلمكم من كل شر..
أول الكلام ذكر الله والصلاة على النبي صلى الله عليه وسلم.

يا عيالي..أنا ما لحقت على أبوي وأمي ، ولا أوعيهم جعلهم للجنة أمين.
وكنت عند أخي فهد الحصحوص عليه رحمة الله وعند أخوي لأمي صالح الثواب الله يرحمه.
إيه...الله يا الدنيا...عشنا مع فهد شهر ومع صالح شهر.
الناس أول غير الطيبة فيهم غالبه وشلون أخوك أكيد أطيب.
أبوي يذكرون لي أنهم يقلون (خلوه) يجي عند أبوه يشوفه قبل يموت! ، و(يزهمون) علي وأنا متحزم بغترتي وفي يدي قوطي أطق فيه..وهم يبكون عليه...وانا رايح جاي ما ادري عن شي.ويلحقوني يبغون يمسكوني ..هيه.ما يحصل لهم وأنا أركض وأدخل بيت (الدواس.)
ومرت الأيام وانا عند أخواني واكثر من رباني خالي- عبد الله بن احمد العمر الثواب- الله يغفر له.
ويوم صار عمري 12 سنة، تركت (العيون) ورحت (ابقيق) واشتغلت فيها أنا و-احمد المجيبل- عند واحد من أهل الحساء الله يبيح منه.. الله يبيح منه وان كان حي الله يذكره بالخير..عملنا معه 8 شهور ما نزلت العيون ولا مره وكنت اعمل معه "طباخ"..الواحد إذا حصل وظيفة كسبان.

وفي يوم الله أراد وجا أخوي – فهد – (لأبقيق) .
هقوتي رايح (للخوص) معه ناس من أهل العيون.
وشاف أخوي –أحمد- الله يبيح منهم.
وسأل فهد ..أحمد وين أخوك محمد؟
قال أحمد : أشوفه مع (هالمصبنة)، لكن ما جاني ولا جيته.
عندها (يطمر) سالم العيد ويقول أنا اوديك لمكانه.
وكانت أول بيوت الناس في ابقيق (برستي).
وكان (معزبي) أسمه- فهد - وأخوي -فهد -..ووصلني العلم
أيه هذا أخوي فهد يبغي يرجعني معه للعيون..
ورحت لمعزبي وقلت له يا عم.
قال : سم.
قلت: راح يجيك رجال اسمه – فهد - يدور علي. إذا جاءك طرده.
قال: وش هو منك ؟
قلت: أخوي الكبير.
قال: افا افا
المهم..شوي إلا ومعزبي يصوت علي: يا محمد يا محمد ..هات القهوة.
قلت: يا لبيه.
ودخلت عليه إلا وأخوي فهد واقف جنب معزبي.
طالعني أخوي فهد وطالعته....................وهلت (عبرته..)
(جعله للجنة)
وأقوم وأحط القهوة وأطبقه في حضنه..
ويستلمني أنت يا اللي فيك ما يكفيك وليه تفعل وتترك، قلبك ميت، ما تنشد عن خواتك ولا أخوانك.
جلس وتقهوى وعين من الله خير..وبعدها قال : أنا استرخصكم.
قال معزبي : وين؟
قال فهد: أدور الرزق..صوت عليه المعزب وقف ...وقف!!
وكان معزبي رئيس (الكانتين) حق ابقيق.
قال : يا محمد) بطل) ذاك الصندوق..
صندوق يأخذ له 70 من . وأفتحه وهو مليان من الأرزاق وسكر وشاي حمر (انقوص) وأحط لأخوي عزبة كاملة وحملته على حميره.
قال كثرالله خيرك..
ورد عليه المعزب ان كان حمارتك تشيل حملتك.
قال فهد لا والله ...كثر الله خيرك ما قصرت.
وشوي إلا وهو ينادي علي.. يا محمد: أقول إن شاء الله (ترمض) عند خواتك.
وكان الكلام في رجب...جاء شعبان وراح ما نزلت وجاء رمضان وأنا ما تعديت محلي في ابقيق
. وجاء العيد والحين ابقيق راح تختلي إلا من عمال (الشفت) كل العالم تحول لأهلها.
إلا ومعزبي (بينزل) للحساء وأركب معه فوق ذيك السيارة (الدمنتي) ولها (تيذر طويل) قال: وين يا محمد؟
قلت: معك أنا مالي أحد هنا وأنت أبوي وأمي.
قال يا حياك الله..
ونمشي على بركة الله ويوم وصلنا عند (العيون) وأنا ..(أصد)عنها........

شرح بعض الكلمات الواردة بحلقة اليوم
هقوتي:توقعي
خلوه :أجعلوه
يزهمون: ينادونه
الدواس: يقصد منزل أبو ناصر الدواس الغريب
الخوص: جريد النخل كان الكثير من أهل العيون والقرى يذهبون لجلب الخوص من نخيل موجوده في أماكن بعيده إما على شاطئ البحر أو في وسط الرمال ويبيعونه ويستفيدون من مردوده
المصبنة: يقصد الصبيان
يطمر: يقفز
برستي: هو منزل أو عشه تبنا من جريد النخل(سعفه) بعد نزع الخوص عنه ترص بجانب بعضها البعض
http://www.geocities.com/dossar52/16.psd.jpg
معزبي: صاحب العمل أو رئيس
عبرته: دمعته
استرخصكم: أستاذنكم
الكانتين : البقالة الكبير
بطل: افتح
انقوص: أي قطه ما هو مفرود على حجم ما يضمه كف اليد
ترمض: تقضي رمضان
الشفت: الوردية
الدمنتي: نوع من سيارات النقل الكبير الثقيلة، وكانت الدمنتي مميزه بصوتها القوي اللذي يسمع من بعد عدة اميال ودمنتي كلمه باللهجه الشعبيه مشتقه من اصل الاسم لهذا الطراز وهي دايمند تي (Diamond T) وهو نوع او طراز من السيارات كان معروف انذاك ولم يعد له وجود الآن ولعل تلك الشركه انتهت وخرجت من السوق او اندمجت مع شركه اخرى وتغير اسمها
http://www.armyfiretrucks.com/DIAMOND_T_1.JPG
تيذر: المقطورة
أصد: ينحي وجهه في اتجه آخر.