قال منهو في المداره = بادي تالي نهاره
باح من قلبه أسراره = يوم بـّرق وأفتكر
أثرى من يبدي الزباره = تشعفه غير اختياره
شفت في رجم الغياره = مثل ماغيري ذكر
شفت ياناس العباير = في طويلات الزباير
من هجير بالضماير = هل دمعي وأنتثر
آه من عين قذاها = ياملا كثرت بكاها
ماتهنت في كراها = باخص فيها السهر
من بدى روس العوالي = يبيعين ماجرى لي
آه واعزاه الحالي = من تصاريف القدر
رجم الأقشر من بدا به = ذكره ياناس مابه
ماتجيب الورق جابه = وماغبى عندي حضر
أحضره يومه طروفه = للجبل واخذ وصوفه
أجمعوا جمله احروفه = وانظموهن بالسطر
من بغى بيضم كولي = يفتهم علمي وقولي
لو يقولون امهبولي = بلعبه سر وجهر
أول مبدى الكتيبة = التوابع والمصيبة
وما بغى ادريفس نجيبه = وانتشرف لا ومر
يامرك لجيت عاني = رح الى اليوم الفلاني
قلت له فـيّا مكاني = قال لي عندك خبر
رحت للدمام حافي = معي خلق الله أولافي
وكم رجال سنافي = مالنا فيها مقر
واجتمعنا في البراحة = كن حن فرقة اسراحة
ليلة الأحد وصباحه = والظهر واتلى عصر
في رجا ادريفس يجينا = كن حنا محبّسينا
لارحم جد اللعينا = جعل يحذف في سقر
حين مايقبل الينا = صفّنا وامر علينا
ثم مدينا ايدينا = خدمة للكلب العور
قام ينظر في الحلايا = مثل شراي الضحايا
ماتجوز له الردايا = كود زينين النظر
ومن قضب منا كتاتي = بات سهران يحاتي
عاف من حلو المقاتي = يوم يواعد من بكر
واركبونا في المواتر = وارسلونا للدخاتر
واشقى من كان فاتر = يوم دش المختصر
يوم يجذب ممحنينه = جاه بوي وسد عينه
والنقط مشاهدينه = في امان وفي سفر
كان عد بلا شعر = كتب له صفر ابصفر
راح هجسه منكسر = واتعبه واللي خسر
وكان هو رجل تكونه = شاف وشوفه يكتبونه
واظهروه ابيوزنونه = ان وفا ولا قصر
عقب ما يوزن غدوا به = وآمروه بفصخ ثوبه
اسدحوه و برقوا به = ان صلح والا دمر
ان دمر واعزتي له = راح وثوبه مايشيله
غوطرت فيه الفشيلة = صايبه ضيم وقهر
وان صلح زانت علومه = وارسلوه الى الحكومة
نثب اجدوده وقومه = بالكفالة والحذر
عقب ذا قالوا تعال = احضر اشهودك ارجال
وسلم العكسك ريال = قبل شور ومستشير
صححوا ي التابعية = وأرسلوها لي هدية
قلت وش يبقى عليه = قالوا قرطاس حمر
ومن أمرني سرت في أمره = واشقى الكولي في عمره
جبتها واعطيت نمره = عقب غربال الدهر
وسنعوني في استور = حد يخدم وحد يدور
بالنعيم وبالسرور = قبل ما يأتي الأدر
الأدر ساس اللعين = كنه الثور البدين
كل هرجه بالرطين = عندنا لامن حضر
كافر مافيه خير = زود ربعه مايسر
ابركه منه وكثير = الريال ايلا ظهر
من تكلم في ازياده = راح ماحصل مراده
وان سكت ياهي قراده = وان تكلم في خطر
من بغى منا يغيّر = ظل في الشبكه امحير
لكن ابن ابن آدم مسيّر = في البرور وفي البحر
اتمنى والتماني = زادني منها امتحاني
من غبطني في مكاني = جاه في حاله غير
الجبل مابه مكظّه = فيه راحات وغضه
كل مخلوق وحظه = وان جزع ماله مفر
وان تعلا الحظ فوق = في البياذر والرقوق
او جنير او يسوق = او استاد ايلا نجر
وان غدا حظه دمار = مسكوه شيول حفار
واستوى طباخ قار = صار في حال غبر
الجبل فيه الأناسه = والمراجل والهياسه
كل مبنى فوق ساسه = من رماد ومن صخر
الجبل مايمنع اللي = فيه خير ومستدلي
من بغى الطاعة يصلي = ومن بغى يكفر كفر