[الجار]

سلام عليكم ورحمة الله
مساء الخير

هذه قصيدة من أروع القصائد...ومن ضمنها بيت الشعر الذي اضعه في توقيعي في عالم المنتديات منذ عام2000 .
هذى القصيد للمرحوم الشاعر
الامير / سعود بن بندر
في والدته الاميره البندري بنت عبدلعزيز
اتمنى ان تنال اعجابكم

ياليتني بينـك وبيـن المضـره=من غزة الشوك الى سكرة الموت
اوليت شاورني القدر بـس مـره=ولبى مطالب رغبتي قبل مافـوت
او ليتي لجـرة مواطيـك جـره=احمي قدم رجلك مثل جزمة البوت
او ليت بيديني السعد والمسـره=واحكم عليها عنك مالحظة تفوت
يفداك عمر منك يشعـر بعمـره=انتي الحياة لنفسي وردة الصوت

وقدر الله أن يموت سعود قبل أمه الأميرة البندري بنت عبد العزيز يرحمة الله فقالت هذه الأبيات:

لين اجتمعتوا لدّت العين لسعود =قامت تلفّت وين قرّة نظرها
وين الكريم اللي سلك سكّة الجود =كم واحدٍ نفسه كسيره جبرها
أضحك وانا قلبي من الحزن ملهود =وأغضى وأذل العين تنثر دررها
رضيت بالمقسوم وأيامي السود =وكتمت نيرانٍ تطاير شررها
أبي رضا ربٍ كريمٍ وماجود =علام مافي برّها مع بحرها
لعل يجمعني بهم خير معبود =في جنة الفردوس نقطف ثمرها

===================================

ليت المنايا وقفت عنك ياسعود=خلّتك لين أوريتني في ضريحي
ياليتني حطّيت انا عنك بالعود=وانت معافا ياجنيني صحـــيحي
أنت الصديق الصادق الود ياسعود=وانت الطبيب لقلبي اللي جريحي
انا أشهد أني عقب فرقاك مقرود=ماأنلام انا لو كان اصفّق واصيحي
والله لصيحك لين أجاورك ياسعود=الله يعجّل جنب قبرك مطيحي
الدمع غار وجفّت العين ياسعود=والقلب ينحب والجوارح تصيحي