[شلال الظلام]

وبالمجلـس سلطـان كانت واصله معه من الملل...
اول ماسمع صوت الباب ينفتح :لا احسن لو تأخرت شوي بعــد ...
عادل وهو كاتم ضحكته:السلام ..
سلطان رفع راسـه :اووه سوري عادل حسبتك اخوك الخاين ..
وبعد ماسلموا على بعـض..
عادل وهو يناظر براسـه الملفوف لأن سلطان كان فاصخ شمـاغه :سلامـات وش فيه راسك ..
سلطان وهو يلمس راسه :آآه ,,ذكرتني هذي وحـده من فعايل أخوك الخاين ...
عادل بتريقه :شكلك متعذب معـه ...
سلطـان بتمثيـل :خلهـا بالقلب تجـرح ولاتطلـع برى وتفضح ,,,ويوم شاف ناصر داخل وشايل الصينيه :تبغـى الصراحـه ياعادل أخوك هـذا ونعم الصديـق تنحسـد على أخوتـه ...
ناصـر وهو يمدله فنجـان القهوه:ايه درينـا مايحتـاج تقول معلقات فينــي ...
سلطـان:الشرهه مو عليك على اللي قاعد يمدحك ولاكأنك اليوم كنت بتقضـي علىحيـاتي ..
ناصـر نزل فنجاله اللي كان يشربه :رجعنـا على طير ياللي ,,سلطـان وأنا وش هوله جايبك اعيشك مو عشان تنسـى ...
سلطـإن :اذا تعشيت أنســى ...
ناصـر لعادل:استعجلوا لنـا بالعشـاء ابغــى افتك من هالسيـره ...
عادل وقف يضحك :انشاءالله ثواني والعشـاء يصيـر قدامكم..
سلطان بتريقه:ماشاءالله بيتكم خـدمـة خمس النجـوم ...
ناصـر ينادي:عادل خلاص لاتجيب عشـاء ...
سلطان :لاااا خلاص كـلش ولا العشاء....
ناصـر :ايه ماهمك الا بطنك ...
سلطــان:عادي تصير في احسن العائلات ,,بعدين حس انها ماله دخل بالموقف وحب يغير الموضوع
سلطان : ناصر متى بتخلص اجـازتك.؟
ناصر وهو فاهم انه يبي يغير الموضوع فماحب يحرجه:وش فيك شكل الضـربه اثرت على راسك انا لي يوميـن مداوم ..
سلطـان :اوووف تكفى لاتذكـرين بالضـربـه احس بألم لاتذكـرتهـا...

ناظـر بساعتـه ورجـع يناظـر بولده اللي جالس وشكله مسوي مصيبـه ..
ابونايف :خيـر وش عنـدك جاي بهالوقت ,,ماتوشف الساعـه كم قبل ماتجـي..
نايف وقف وبتوتر : يبـه ابيك بموضوع مهم ...
أبو نايف وهو يأشـر على قميصـه اللي عليه دم :وش اللي عليك هـذا .!
نايف :تخانقت مع واحد وطعنتـه ...
أبونايف بالصـدمه :وش صار فيه ..
نايف:بالمستشفـى حالتـه خطيـره ..
أبونايف :حسبي الله عليك مـن ولد أنت متـى بتعقـل كل يوم مسويلك مصيبه أكبـر من اللي قبلهـا..
نايف :يبـه مالـه داعـي هالكلمتيـن اللي ترددهن علي كـل ماشفتـني ..
ابونايف بعصبيـه:لابعد مو عاجبك كلامـي ..
نايف:تبي الصـراحـه ايه مو عاجبنـي ,,أنا ماسويت شي عشان تقولي هالكلام واحد وطول لسـانه علي ولازم يأخـذ حسـابه ..
أبونايف :وأي واحد بيتكلم عليك بتسوي فيـه كـذا أنت تحسب الدنيـا سايبـه مافيه قانون تبغـى تذبح عيال الناس و تبي تطلع منهـا..
نايف بغرور:ذولا مهم ناس وموتهم أفضـل من حياتهـم ,,بعـدين أنا قلت لك اللي عنـدي ,,ومع السلامـه ..
ابو نايف اللي جلس بالتعب على الكـرسي وفك ازارير ثوبــه وهو بصعوبه يتنفس :هـذا اخـر دلعــي له حسبي الله عليه مفشلني كل يوم مجررني لأقسام الشرطه بس وش اقول هذي تربية رأس الحيه شيخه...

يـوم الأثنيـن السـاعـه 8 ونصـف بالليـل ..
وبمطــار الملـك خــالد وصـلوا ياســــر وسعـــود ,,,
ياســر:وين بتـروح اللحيــن ..
سعـود:بروح بيت أختــي ..
ياســـر:بتسـوي عمــرك توك راجــع ...
سعــود :أكيـــد ...
ياســر:طيب شل قشك بسرعـه انا بروح اخلـص الاجـراءت ..
سعـود :بسـرعه ابغـى اروح لهم قبل ينامـون ...
وبعـد ماخلصوا الاجـراءت وخـذوا شناطهـم ...
ياســر:وش رايك نروح اليوم لشقـه وبكـره تروح لهـم ...
سعــود :لا اليوم ماقدر اصبـر أكثــر مشتاق لهــم ..
ياســر:ايه واضح والدليل أنك جلست 6اشهـر ومارحت لهــم ...
سعـود بعصبيـه:اووه ياســر لاتكلم معـي بالموضوع مره ثانيــه اعتبـرني تونــي جاي ...
ياســر: طيب ,, طيب بـس لاتعصب..
سعـود :مو تقول سيارتك بالمواقف وش تنتظـر بعـد يالله نطلـع ...
ياســر:طيب شل شنطتك ولا تبغانـي أنا اشيلهـا بعــد ..
وبعـد نصف ساعــه كانوا واقفيـن قدام بيت ابـوناصــر ...
ياســر :وش تنتظـر بعـد يالله إنـزل ...
سعــود:متردد ,,مادري كيف بتكون ردة فعلهـم لو شافـونـي ..
ياســر اللي فيـه نوم :ادخـل عشان تشوف كيف ردة فعلهــم .!!
سعــود بحـزن :اخـااف يكونون ناسينـي وانصـدم ...
ياســر:اوهوه علينـا ,,ايه صح والدليـل أختك اللي فضحتنـا بالمكتبــه ,,ويقلد صوت سالي :سعود سعود ...
سعـود :ههههههههههههههه,,حـرام عليك أختـي صوتهـا مو كـذا ...
ياسـر بنرفزه: ياربي انزل مو وقتك أنت وأختك ..
سعـود :خلاص نروح لشقـه وبكره اجــي ..
ياسـر انبسط :قايلك كذا من البدايه بس أنت عنيد ...وتوه بيحــرك سيـارتـه وقفت سيارة ناصـر وراه
ياســر يقهــر:لا مو وقتــه ,,اوووووووف ..
سعـود :وش فيك ..
ياســر :ماتشوف اللي وقف ورانا ..
سعـود :طيب ..
ياسـر بقلة صبــر:هـذا ناصــر ,,انزل انزل مافيـه مفــر ..
نزل فالبـدايه ياسـر بعده بشـوي نزل سعـود اللي كان خايف من ردة فعـل ناصـر لاشافه خصوصاً إن علاقتهم كانت سطحيـــه ...
ناصــر كان توه بيفتح باب البيت بيدخـل شاف سيارة ياســر وتنهـد بقهـر لأنــه كاره شوفتـه وبنفس الوقت مستغـرب وش عنـده جاااي .؟
دخــل مفتـاح السياره بجيبـه وهو يتقـرب من ياسـر برود :هلا ولد العم الحمـدالله على سلامـه ..
ياسـر بنفس البرود وهو يسلم عليـه :الله يسلمك,, كيف الحـال .؟
ناصـــر بسخـريه :تمـام من شفناكـم ...
ناظر ياسـر وراه وهو يلعب بمفاتيح سيارتـه يدور سعـود ماشافـه التفت على الجهه الثانيـه شافـه جاي من ورى السياره ...
استغـرب ناصــر من ياســر اللي ساكت وانتبــه عليـه يناظر وراه التفت يشوف وش وراه شاف سعــود
"أيــه سعـــود" نطقهـا ياســر يجاوب ناصـــر اللي طلعت منـه بدون ادراك ...
ناصـــر بفـرحه بانت على وجهـه :سعوود خالــي سعــود ...
سعــوداللي طمنته ردت ناصـر :سعـود بس مو خالك يالشيبــه اطول منـي وتقـول خالـي ..
ناصـــر وهو يسلم عليه بحـراره :الحـمدالله على السلامـه تو مانورت الرياض ..
سعــود :الله يسلمك والرياض منوره بأهلهـا ...
ناصــر وهو يفتح الباب :تفضلـوا حيـاكم ..
ياســر وهو يتراجع لسيـارته :يالله أنا استئـذان ..
ناصــر اللي كان مزاجــه منقلب :لا عاد حلفت عشاك اليوم عنــدنا ...
ياســر اللي كان دايخ ويبي الفراش بـس :ماله داعــي تحلف يالرجال والله تعبــان من الطيـاره ..
ناصــر باصـرار :حلفت عـاد ..
ياســـر دخــل مجبـور بعـد هالكـــــلام ماعنـده عـذر ...
دخلهــم ناصــر المجلـس واتجـه بسـرعه للبيـت لأن كالعـاده اصــوات اخــوانـه واصلــه لآخــر الحـاره (صدق فضيحــه خخخخخخ) ...

دخـــل ناصـر عليهـم لـو كان بمـزاجــه اللي دايم ماخلاهـا تمـر بسهـوله بس اليوم الوضـع غيـر وماهو فاضــي لهــم ,,
ناصــر وهو يلف نظـره على الصالــه اللي متلـونه بالونـي الازرق والأصـفر ...
ناصــر بطنـازه :والله لوكنت داخــل استـاد الملك فهــد ماقوبلت بهالأصـوات ..
بـس محد لقـاه بال لانهم كلهم عيونهم متسمـره بالشاشـه ...
ناصــر اللي وقف قدام التلفزيون :هووه وش فيكم أنا اكلمكم ..
سالي اللي مقهـوره لأن الهـلال متقـدم على النصــر :يووووه وخـر مو وقتك ماتشوفنـا نتابـع المبـاراه ..
ناصــر بتريقــه :لاتحاولين الهلال فايز عليكــم فايز ...
سالي :ناصرر واللي يرحم والديك وخـر عن التلفزيون والله مو رايقـه لثقالت دمك ..
ناصـر اللي وخــر :طيب بوخـر بس لاتصيحيـن ,,وناظـر بعادل اللي مره مندمج مـع المبـاره :عادل الحقنــي بالقهـوه عندي ضيوف ..وطلــع ..
عادل بقهــر:لاحرام عليكم هـذا وقت زيارات ...
سالي :ويه رح بسـرعه ود القهـوه اللي يسمـع يقول بتفوزون ..
سامــي :غصبـاً عنكم بنفوز وبتاريخيـه بعـد ..
عادل :اوووووووف مابغــى اروح خلو ميري تودي القهــوه ..
وهج تضحك:ياليت عشـان تشوف ناصـر وش بيسوي فيـك ..
سامــي وقف:خلاص أنابروح امري لله ,,بس اذا جابو الهلال هدف ارسل علي مسج ...
عادل بيصرفـه:طيب طيب ولا يهمك ..

وبالمجلـس كان ناصـر وسعـود يسولفـــون مـع بعض وياســر معهم فــي جســده وعقلــه بمكــان ثانــي
مع انسـانه حرمت عينـه النوم من شوقـه لهــا ...
سعـود :ياسر,, ياسررر..
ياســر بارتباك:هاه ,,نعـم ..
سعــود وهو كاتم ضحكتـه :خذالفنجـال من الولد له ساعه ماده لك ...
ياســر اخذ الفنجـال من سامي بأبتسـامه يغطــي فيهـا على احـراجـه ..
ناصــر :وش فيك ابو ابراهيـم منت معنــى ..
ياســر اللي للحين مو على بعضه :سلامتك مافينــي شـي ..
ناصـر مايدري ليش حس أن ياسـر يفكـر بسالي فحب يحـرجه وقال:سامــي روح ناد خالتك سالي تسلم على اخوها (وعيـونه على ياســـر اللي واضح عليـه الارتباك والرجفـه بانت على يده اللي ماسك فيهـا الفنجان بس مانتبه له الا ناصـر ) بس لاتقول لهـا من الموجودين خلهـا مفاجئــه...
سامي اللي مادخلت مخه السالفه :طيب وش اقولهـا تعالي فيه رياجيل بالمجلس سلميي عليهـم ..
سعــود بضحكــه:قلهـا إن اللي بالمجلس جدك ...
ناصــر يستهبـل:وقولها أن سعـد معــه ..
سامي اللي يدري أنه لوقال لسالي عن سعـد ماراح تجـي:من صدقك أنت ..
ناصـر وهو يضحك :امزح بس قولها إن الموجود جدي ..

كانت حاطـه راسهـا على رجل وهج وتابع المبـاره وهي مقهـوره لأن فريقهـا متأخـر بهـدفين والمباره بنهايتهـا ..

جاء سامي وبعـد ماسئل عن نتيجـة المبـاراه قال:خالتي روحي للمجلس جدي فيــه ..
سالي بملل :يوه وش جايبـه اللحيـن والله مو وقتـه ,,مايكفي انه سوى اللي براسـه وزوجنـي اللي ماينسمـى وش يبغـى بعــد ...
سامــي يوم سمـع تقول عن ياسـر كذا كان وده يضحك بس مسك نفســه لأنه ماتحمس يبغـى يشوف ردة فعلهـا لاشافته:وأنا وش دخلنـي تقولين لي هالكلام ..
سالي بتردد:سعــد معـه ..
سامي بسرعـه :لابس هو لحاله ..
سالي ناظرت وهج :عادي اروح كذا مالي خلق ابدل ...
وهج جاء بتكلم بس سامي قاطعـها :أي عادي واصلاً لبسك حلو ..


سالي ناظرتـه بشك حست وراه سالفـه وقامت وقفت قدام مرايـه كبيره بديكـور الصـاله وجلست ترتب لبسهـا وتضبط شعـرها اللي كانت مرجعتـه على ورى بالجـل (كانت لابسـه بنطلون سبورت رمـادي بخطين بالأسـود وتي شيرت اسود كت ماسك عليهـا )...
ناظرت بسـامي :يتجـي معـي ..
سامي على طول وقف :وهذي حاجه تنفوت ..وطلع قبلهـا بسرعـه ..

كانت تمشـي رايحـه للمجلس وتحس بقلق وتوتر يزيد داخلهـا كل ماقتربت من المجلـس ..
يوم وصلوا للمجلس وقف سامي والتفت لسالي يبغـاها تدخـل ...
بس سالي قالت له :أنت ادخل قبلي ..
سامي ماعارض وعلى طول دخـل ...
أول مانفتح الباب قطعوا سالفتهـم اللي كانوا يتكلمون فيهـا واتجهوا بأنظـارهم للباب بس اللي دخــل كان سامـي وترك الباب مفتوح وراه ...

نهــاية الجــزاء التـاسـع ...