[دنيا ماترحم]

على شاطي الخبر وقفت أدور للخبر عنوان
أطالع بالبيوت وبالمباني وبالسما فوقي
وفي قلبي من الماضي لهايب تشبه البركان
أتذكر علوم ٍفايته والقلب محروقي
واقول بخاطري ياهالاماكن عاش فيك انسان
مثل نفح النسيم برقته والشكل والذوقي
ترك في خافقي جرح يعاودني مدى الأزمان
الا مني تذكرت الجحود وقلة وفوقي
وانا الغلطان ياشاطي الخبر والله انا الغلطان
واتوب من الخطا لله وسامحني على عقوقي
ماجيتك بعد هذا العمر ادور للوصل رجعان
ولكن في حنايا الجوف ندم ماهو بمسبوقي
الا مني تذكرت الدموع بساعة الأحزان
وجهلي والعناد ومنطقك ليه ومنطوقي
تسابقني دموعي واشتياقي لجنة الغفران
بعد ما الهب فؤادي سوطك اللي قطع عروقي
يحق الك العجب ويش جابه الحينه بعد ما كان ؟
اهو صاحي؟ اهو مجنون؟ اهو للحين مطفوقي؟!
جيتك يالخبر واله على كلمة رضا واحسان
تقول مسامحك من قلب على نظمي وطاروقي
وانا ادري يالخليج انك تشيل الدر والمرجان
وموطن للكرم كله ومثلك ماهو ملحوقي
وسلام الله على امواجك وعلى شاطيك يالفتان
وحماك الله من غدر اللئيم وراعي البوقي