[دحووومي]

نزعل ونتكبر وحنا من الطين

والكل منا يصد لا أقبل خويه

نفخر نقول إنا على الصد قاوين

وهي علينا في الحقيقه قويه

ننسى نهايتنا وعلى وين ماشين

وننسى الزمن اللي جمعنا سويه

المشكله ماهي بحاجه لتخمين

ولا هي أبد ياناس صعبه القضيه

دق الرقم:كيفك..هلافيك..واهلين..

أنا الخوي اللي مزعل خويه

تغيب تبعد صورتك داخل العين

ويبقى لحبك في خفوقي بقيه

اخوان حنا لو يجي بيننا شين

ومانفترق دام المحبه نديه

خلك قوي لا تحتكرك الشياطين

قبل الفوات وقبل وقت المنيه

هذي هي الدنيا من الحين للحين

لابد بين الناس تحصل خطيه

ومن لا يقدر غلطة احبابه الحين

يقرا حروفي ويعتبرها هديه

باكر تمر سنين وسنين وسنين

والكل يرحل في الدروب المديه

صدقني تندم واذكر حروفنا زين

تندم على خلك إذا غاب ضيه

دنيا غريبه واكثر الناس ماشين

وكم صاحب والله دفنته بيديه