[مغرور بس معذور]

قندرلا

طبعا هاي ام عباس خبصتني تكلي حمودي اريد اصير دلوعه ورقيقه مثل سندرلا كتلها ولج مايصير
انتي قندرلا مو سندرلا ماترهم فكالت لا فدوه حمودي اريد اصير دلوعه ونازكه كتلها والله ما اعرف
راح اسوي موضوع بالمنتدى ونشوف تعليمات البنات شلون الوحده تصير دلوعه ورقيقه ونازكه

كالت هو عدكم نازكات دلوعات بالمنتدى كتلها اهوووووووو شكد عدنه حوالي ولا وحده دلوعه
بالمنتدى كلهن مشوربات والحلوه بيهن مسويه سكسكوكه فكالت لعد فدوه اسئلهن اريد اصير بلوعه
قصدي دلوعه ولك حمودي اريد ابو عباس يحس انه مزوج انثى هو يوميه من يشوفني يكلي
جنج هذا المصارع السمين الي على الكارتونه مال الستلايت السترونك
كتلها اهم شئ بالرقيقه الدلوعه هي من تحجي تحجي بصوت ناصي حتى اتبين هي انثى طاغيه
مثل هتلر كالت هاي سهله من باجر احجي بصوت ناصي وفعلا ثاني يوم راحت للفرن
مال الصمون تشتري صمون هي راحت وره اسبوعين يالله رجعت لانه تحجي وي ابو الصمون بصوت
ناصي وابو الصمون مايسمع يكلها شنو ما اسمع شرايده ما اسمع واسبوعين يالله سمع اريد
صمونات اربعه وره ماسمعها تفل ابوجها واجتي عليه تبجي اشو صرت دلوعه وحصلت تفله
بوجهي ليش عاد كتلها ولج مو كتلج انتي قندرلاه مو سندرلا


كتلها جربي الثانيه من اضحكين خلي ايدك على حلكك وضحكي بدلع هاي بس الدلوعات
يسونها مو اضحكين اتشكين حلكج كله لا خفيف وخلي ايدك على حلكك كالت خوش وفعلا
ثاني يوم صادف قرايه مانسوان الاربعين مال ام ستار زوجها مات فجاءه من جان يذكر
ايام عرسه اول ليله اشو مات مدري ليش المهم هاي ام عباس كاعده بالقرايه النسوان
يطلمن وهي حاطه ايدها على حلكها وتضحك وجان النساوين كلهن كامن بالنعل دك على ام عباس
وهم اجتي تبجي اشو صرت دلوعه والنسوان دك بالنعل عليه بس الحمد لله محد تفل عليه مثل ابو
الصمون كتلها ولج مو كتلج انتي قندرلا مو سندرلا


كتلها جربي من تسلمين تكولين هاي كله هاي بعد لا تكولين بالسلام بس هاي كالت هاي سهله
خطيه حتى بصلاتها من تكمل وتسلم تكول هاي على اليمين واليسار مستويه كلش تريد تصير
دلوعه المهم راحت للسوك وراحت لام امحيسن تشتري منها كرفس ورشاد وصلت يمها وكالت
هاي ام امحيسن وخطيه ام امحيسن بقه صافنه ولحد الان صافنه كاعده بالسوك حتى الكرفس
مالتها يبس وذبل وهي بعدها صافنه السوك عزل صار الليل وهي بعدها صافنه ولحد الان اذا
رحتوا لسوك الكاظم راح تشوفون امريه لابسه عبايه وصافنه لا عبالكم صنم تره هاي ام امحيسن
خطيه من سمعت الهاي مال ام عباس صار عدها تكلس بالعظم وهم رجعت ام عباس تبجي تكول
اشو كل ما اكول هاي الناس تنصدم لو يخرط بالكاع لو يغم روحه لو يزوع شنو السالفه
كتلها ولج انتي قندرلاه مو سندرلا


هسه بعد ما اعرف اسئل البنات بالمنتدى شلون الوحده تصير دلوعه ونازكه يعني شنو
التصرفات حتى الناس يكولون الله هاي دلوعه غنوجه نازكه