يوميات محشش >>هذا العضو فاطس من الضحك

[الهاوي173]

الموضوع هذا جايبه لكم واتمنى انه يعجبكم


الموضوع هذا يتكلم عن يوميات واحد محشش



المهم مابي اطول عليكم واترككم مع القصه

بسم الله وبه نستعين

بتركه معكم يسولف عليكم بس ان قال شي غلط لاتقولون له شي

اخاف تجرحون احساسه

مساء الخير مدري
مساء الصباح قصدي صباح المساء

اقول :


الي هو صبحو مسو على كيفكم < ابوك يالبدايه ياشيخ


المهم وانا في عز النوم والا فجاة ... رن التلفووووون ...

وطبعا تلفوننا شايل ابوي منه كل الارقام .. موب مخلي الا رقمين التسعه والثمانيه ... يعني ماالك الا تدق على الشررطه ولا الدفاع المدني وغيره مافيه ...

المهم


اني رفعت السماعه واقول نعم الا وذااك الصووت الي يررد الروووح ..صووت بنت .. واخوووكم اذا سمع صوت بنت اوجعه بطنه وانواااع التوجع .. وقالت الووو ..انا ماعاد عرفت وش اقول انشلت براطمي قمت اقول ال ال ال ال الوووو .. قااالت مين معاااي ..؟؟؟؟

قلت ... معااك اانااا <(( صراحه جوااب يدل على ذكائك ...!! ))

وهي الي تضحك . واناا قلبي احسه مووب طبيعي ...قالبها سامري وتستنزل عندي الكبد والبنكرياس .... انواع الربكة ... وقالت لي .. سوسو موجوده ..؟؟؟

قلت لهاا .. ماينفع طوطو ...؟؟؟

قااالت مين طوطو ..؟

قلت .. هذا اسم الدلع حق الطااووس اللي هو انا ..وضحكت للمرره الثانيه على التوالي <(( يقاله خفيف دم الحين ))


وقالت .. يؤ يؤ ... شكلي غلطانه .. طيب آسفه .. قلت لهاا .. لا عاادي ..لاشكر على واجب <(( دايم اسمع هالكلمه وجالس احتري الفرصه اني اقولها ...!! ))

وقفلت السماعه....تصدقون ... ماادري وش صار فيني .. حسيت بشعقريره في جسمي .. ... وان ودي اروووح انبطح في الحووش ...واكتب قصيده هجائيه

لايكون هذا هو الحب الي تقولوون <(( نعنبو الحب الي تعرفه يالضفدع ...!! ))

عاد انا ماني متعووود على البناات ..لان ما شاءالله بيتنا فيه خمس طعشر رجال الي هم اناا واخواني وابوي وامي <(( الله يخلف على ابوك واميمتك هذا وانت اكبر اخوانك عليه العوض ومنه العوض ))

المهم .. يعني انا واخواني ماشفنااا بنت ابد .. وهذا اللي سبب لناا عقدة تسمى العقدة الفيسلوجيه .. < ((من وين جت ذي ...؟ ))

المهم اني قررت اتعرف على بناات ... بس فيه مشكله وحده اللي هي اني مااعندي اسلوب ابد <(( يعني وقفت على الاسلوب .. نعن ابوك انت عندك الف مشكله ومشكله انت ووجهك الي كنه لوحة انتبه امامك نقطة تفتيش ))

الوكاد اني ماالقيت قدامي الاا وااحد من العيال اسمه (( عبدوش )) معروووف ان البنات مايعوقون معااه ... وانا اللي اللقط مفتاح سيارتي واروح له

الووكااد .. اني رحت لعبدووش ..وعلمته بوضعي ان امنيتي في الحياه اتعرف على بنت قبل ما امووت .<(( أخسسس يالشايب ))

فقال لي .. السالفه بسيطه .. اذا بغيت البنت تحبك حسسها انها احسن وحده في العااالم .. قلت له .. يعني كيف ... يعني اقولهاا انتي احسن من مرااادوناا ...!!

وهو اللي يرفسني برجله في بطني .. وقال لي .. انت ثووور .. وش دخل مرادوناا يالغبي ...؟ اناا قصدي انك تحسسها بانوثتها وان مافيه بنت غيرهاا في العالم .. قلت له .. برضه مافهمت .. يعني تبيني اذبح كل البنات واخليها لحالها ...؟ وهو الي يمووه علي برررجله ويمحطني بيده على جبهتي ... وقال لي .. شووف انت حمااار .. مارااح تفهم الا بالدروس العمليه .. ويطلع جواله ويدق

وقال لي .. شووف اناا هالحين بكلم وحده .. وتعلم .. قلت له .. طيب .. وكلم .. وقال .. هلا حياتي هلا عمري هلا رووحي .. اناا لؤي حبيبك ومجنووونك <(( الحمدالله على نعمه العقل .. نعن ابوك وين لؤي معه والله لو اشوف وجهه في احسن الاحوال بعد ما اعطيه غير اسم جعفر قال ايش قال لؤي ))

وقام يقولهاا .. احبك وامووت فيك .. انا بدونك مثل البيت بدوون حاره .. مثل التلفون بدون حراره .. مثل السواق بدون سياره .. انا البنزين وانتي الشراره ..انا الشارع وانتي الاناره .. انا الرومنسيه وانتي الاثاره .. انا مبنى التجاره العاالمي وانتي الطياره ...بعدها قصم بالله اني بغيت اضمه وابووسه يوم سمعت كلااامه ...حسيت بشعوور غريب ... ينعن ابليسه لو يكلم جدار كان ذااب

مالكم بالطويله .. المهم انه خلص المكالمه .. والتفت لي .. وقال لي .. يالله دورك .. باعطيك رقم بنت وكلمهاا .. وقوول لها نفس كلامي ... قلت له بكل خجل طيب .. وهوو الي يدق على بنت ويعطيني الجواال عشاان اكلمهاا .. واناا اللي اقوول الووووو .. ويوم سمعت الصوووت ضاااعت علومي ..ونسيت كل الكلاام .. وقلت لها .. باب فيــن ..؟ وماحسيت الا بذيك الجزمه وانتم بكرامه الي لازقه في مقفاي ... وقال لي .. قوووول نفس الكلاام اللي قلته يالثوور .. واناا اللي اقول لهاا .. هلا حياتي هلا روحي هلا تعالي .. وقالت طيب وبعدين .. قلت لها

انا بدونك مثل الكيبورد بدوون فااره

مثل التقاطع بدوون اشاره

مثل الحماار بدوون حمااره

مثل السلطه بدوون خيااره

انا محترف وانتي نظام الاعاره

انا الولاعه وانتي السجاره

اناا الددسن وانتي الغماره

انا طوووط طوووط طوووط طووط

قفلت الخط في وجهي ... قال عبدووش وش فيك ..؟ قلت له .. لا ابد الخط مشغول <((مايعرف يصرف ابد))

ومادريت الا وعبدووش مطلع لووح فيه مسامير ودبجني فيه اللين ماقلت للعنز ياخااله

المهم .. اني رجعت للبيت ودماني تصب ومااليه وجهي من كثر الطق اللي جااني من عبدووش ... لدرجه ان اللي يشوفني ماايعرفني .. طالع كني مسابقة ... من صاحب هذه الصورة .. اللي يحطونها في المجلات.. وانا الي ادخل البيت وبشوويش عشان مايشوفني احد .. واطلع غرفتي واسكر البااب واناام .. وفي عز النوووم ... دق جررس التلفون .. واررفع السمااعه .. الا هي نفس البنت اللي كلمتني اول مرره .. قلت نعم .. قالت ..سوسو موجوده ..؟

قلت لها .. شوفي .. بيتنا كله شباب .. ومافيه احد يبدا اسمه بحرف السين .. انا واخواني كلناا اسمنا خالد .. ومافيه الا اخوي الصغير فهد وهو اللي اسمه نايف ونناديه عبدالرحمن <(( وش عنده عاادل اماام ))

والبنت كرررتها ضحكه .. وقالت .. ماشاءالله عليك دمك خفيف .. ((هي تحسبني استهبل مادررت اني دلخ من جد )) وقلت قلها .. شكراَ ..<(( مسوي مؤدب ))

وسالتني البنت .. وش تسوي هالحين ..؟ قلت لها .. والله كنت ناايم .. يؤ يؤ تنام في الليل انت ..؟ قلت .. اجل متى انام ...؟ قالت .. لااا اناا اناام في النهار واسهر في الليل .. قلت لها .. ليش الاخت بوومه ..؟ قالت .. لا بس الليل وقت الرومنسيه .. انت تعررف الرومنسيه ..؟ قلت لها .. لاوالله مااعرف بنات انا ....<(( مسوي فيها فاهم ))

وسالتني .. انت وش اسمك ..؟ قلت لهاا مصيول قالت وش معنااة .. قلت لها .. هذا اسم كلب كان عند جدي وسماني ابووي عليه لاني اشبهه .. وسالتها .. وانتي وش اسمك .. قالت دااليداا .. قلت لهاا ..انا ابي اعرف اسمك مو عيارتك ..؟ قاالت .. هذا اسمي <(( هذولي البنات تسالها وش اسمك .. تقول رهف ولا شووق ولا افنان .. ولو عذري بس انه من جنبها ))

سوويت فيهاا اسلوب وقلت لها اني حبيت وحده بس انتهى هالحب . لاني اللي حبيتها خانتني <(( نصبة اي شااب اول مرة يتعرف على بنت ))

قالت لي .. من حبيت ..؟ قلت لها .. حبيت عنز جيراننا .. بس انهاا خانتني مع تيس سووري عشان له قذله ..

المهم .. ان البنت قالت لي اووكي اكلمك بكررة لان امي تناديني .. قلت موو مشكله .. وتطووورت العلاقه .. وصرنا نكلم بعض كل يوم ..واناا انقلب حاالي .. ولاحظو اهلي اني تغيرت .. يعني نكوون جالسين على الغدا ولا العشاا وانا ماكل .. سارح ... ولاحظو اهلي اني صررت مؤدب واقراا وااجد .. واناا اقراا عشان اعرف كلام جديد في الحب .. تلقاني اقراا كتب الشعر والحب والطبخ (( لاتستغربون لان كتب الطبخ اتعلم منها كلام حلو بعد مثل .. ياعسل .. ياحليب .. ياقشطه .. ياكريم كرامل ))

وبرضه صررت ادخل كتب ممنوعه للبيت ..مثل كتااب ..ماذا تفعل ليلة الدخله ..وكتاب .. سنة اولى زوااج.. بس المشكله انهاا ضاعت هالكتب مني وصررت ارروح عند بياارة جارنا اللي طافحه واقعد افكرر واتامل وارمي حصى وسط البياره <(( مسوي رومنسي .. مثل اللي يجلسون على البحر ويرمون حصى ))

المهم .. انه في ليله من اليالي .. قالت لي البنت مصيوول اوصفلي شكلك ..؟ يااوالله البلشه .. وش اقولها هذي هالحين .. اقولها اني قرررد .. اعترف لها بالحقيقه المرره واقوولهاا اني جدار مالي ملامح .. اعترف لها اني شبيه عبدالله سليمان ((الف الحمدالله والشكر ))

الوكاد اني قلت في نفسي .. ياولد خلني اسووي مثل كل الشباب ..وانصب عليها يعني تلقى الواحد من الشباب شيييين واذا شفته في الشارع ماتدري هو رايح ولا جااي لان وجهه ماله معالم .. ولو تشوف وجهه تحسبه وااحد معطيك مقفااه . يعني مفرووض يحط لووحه على وجهه ويكتب .. تررى هذى وجهي .. عشان الناس مايلخبطون بين وجهه وقفاه .. وانا مثلكم واردى .. انا اذا قابلت احد يجلس ساعه محتار وين وجهي من قفااي وما يعرف الا اذا لقى الورقه ..لان فيني ورقه مثل الي تجي في الفنايل والسراويل عشان تعرف ورى وقدام

المهم .. اني قلت لها .. انا عيوني مثل عيون جوااد .. وطولي مثل طلال الرشيد .. وخشمي مثل خشم خالد عبدالرحمن ..وملحي مثل ملح راشد الماجد .. ومهضووم كثير مثل رامي عياش <(( والله ماناقص الا تحط ملحن معاهم ويكمل الاوبريت ))

الوكاد ..ان البنت شكلها خقت معي وقامت تشاهق من الفرحه .. وسالتها اناا وانتي اوصفيلي شكلك .. قالت .. مااقدر لما تشوفني بتعرف ..لان مالي شبيه <((اخسس يابرتني ))

وانا اللي افك خشتي وسعابيلي تقووطر ..كني كلب شايف له عظمه .. وقلت لها يعني باشووفك ..؟ قاالت اكيد .. انا بكرره بارووح شاليهات اليمامه اللي على طريق الرياض الخرج .. ونتقابل هنااك ..قلت لها .. بس هذيك للعوائل بس .. قالت عااد انت دبر نفسك .. قلت اوكي مو مشكله بس كيف اعرفك ..؟ قالت بيننا الجوال .. اذا وصلت كلمني وانا اعلمك وين تلقاني قلت لها .. خلاص الوعد هنااك .. المهم .. اني انا توهقت وشلووون ادخل الشاليهات وهي للعوايل

وقلت ماالي الا عبدووش .. اتصل عليه واتفاهم معه .. ودقيت عليه .. ورد علي وقال بعصبيه ... نعم وش تبي يالغبي ..؟

وعلمته السالفه من سلسل اللين طقاق عليكم ((تراني اقصد من طقطق اللين السلام عليكم بس مدلخ شوي ))

وقال لي .. والله صعبه وش بتسوي ..؟ قلت له .. وش رايك تلبس عبااه وتسوي نفسك حررمه وتروح معي على انك زوجتي ..؟ وهو الي يتغيرر وجهه وقال .. انا ولد ابوي .. قلت له . بالله ..توني ادري .. كنت احسبك ولد ابوي انا .. قال تستهبل انت ...انا اسوي نفسي حرمه .. ياويل ويلي ويلاااه .. خيل الخيل خيالها .. قلت له ... يارجال انثبر مكانك لاادوس على بطنك جالسين في مضارب الباديه حنا ..؟ قال لي .. لايامصيول هذا شي مااقدر عليه ..وش اقول للجماعه ...؟ قلت له .. ومن قالك اننا بنحضر عررس .. حنا بنرووح الشاليهات ..وانت ماراح تكشف وجهك ابد .. قال .. طيب ليش انت ماتسوي نفسك حررمه وانا الرجال ..؟ قلت له .. ياخوي مااقدر ..لاني لا رجال نافع ولاحرمه ابنفع..وبعدين حتى لو غطيت وجهي بيكشفون اني ماني حرمه من ريحتي اللي كنها ريحة شرابات عزووبي .. قال لي .. خلاص بس لا احد يدري .. قلت له .. ابشررر .. بس جهز نفسك بكره بامرك ونرووح ..

واخذت سياره واحد من العيال .. ورحت لبيت عبدووش ولقيت عند بابهم شحاده وهي اللي تجي تبي تركب .. قلت لها .. الله يعطينا ويعطيك ياخاله ..وهي اللي تطق قزاز السياره شووي وتكسرهاا .. وانا اللي اطلع من جيبي رياال ونص كنت ناوي اشتري فيه توكس .. بس قلت مو خساره فيها عشان الله يوفقني .. وتوني افتح الدريشه باعطيها .. الا وهي تقول افتح الباب الله ياخذ هالراس .. الصوت مو غريب علي .. يوووووووه عبدووش .. قال .. اييه عبدووش الله لا يبارك فيك افتح بسرعه قبل مايطلع احد من اهلي .. وفتحت له الباب ووركب .. وانطلقنا للشاليهات .. المهم وصلنا الشاليهات ... ونزلنا من السياره

وامسك يد زوجتي .. الي هي عبدووش سابقا .. ودفعنا التذاكر .. ويووم جينا بندخل .. وقفنا الحاارس اللي على الباب وقال .. لحظه .. لازم زوجتك تدخل محل تفتيش النساء لاننا شاكين فيها ..

قلت له ليـ..؟..ـش في مطار حنا .. تراه شاليهات .. وبعدين وش فيها زوجتي ..؟ قال الحارس .. ياخووي وش هالحرمه اللي لابسه زبيريات ...؟ وانا اللي اناظر في رجول عبدووش الا فعلا لابس زبيريات ... يالله لا تفضحنا بس .. وانا اللي اقول للحارس ممكن تتركني مع زوجتي .. ابيها بكلمة راس .. قال لي ادخل هالغرفه وتفاهم معاها .. وانا اللي اسحب عبدووش للغرفه .. واترفس في بطنه وانواع الاكوااع .. نعن ابوك يالغبي زبيرياااات مره وحده ... قال ... وش اسوي مالقيت جزمه كعب على مقاسي ... وقلت له ... اسمع .. نزل العباه على رجولك عشان ماحد ينتبه يالغبي

المهم اننا رجعنا للحارس .. واعتذرنا منه على سووء التفاهم .. ودفيناه بميه ريال عشان يسكت . واول مادخلنا استاجرت شاليه صغير وقلت لعبدووش يجلس فيه .. وانا بارووح ادور خويتي .. وطلعت .. ودقيت جوال على خويتي .. ووصفت لي مكانهاا.. تقول انها عند الشجر اللي جنب المطعم .. وانا اللي اروح هنااك واجلس ساعتين ادورها مالقيتها .. وادق عليها جوال قلت لها ... وينك فيه لي ساعتين ادوورك .. قالت .. انت الي وينك بالظبط ...؟

قلت لها .. انا واقف جنب كيس زباله .. وانتي وينك ..؟ قالت .. انا واقفه جنب واحد مجنوون وعليه قل صح .. وانا اللي اللتفت وراي .... اوووووب .. هذي هي (( افا طلعت انا المجنون اللي تقصده .. وطلعت هي كيس الزباله اللي اقصدها ))

وهي اللي تنصدم .. وقالت .. هذا انت ..؟ وين الوصف الي تقووول .. اجل طلال الرشيد هاه ..امحق من طلال اللي تشبه له انت .. (( صادتني ان عيوني مثل عيون خالد الملا .. وجسمي مثل نبيل شعيل .. وخشمي مثل عبدالمجيد عبدالله ))

قلت لهاا .. لا انا فعلا مثل ماقلت .. بس صاار لي حادث هو اللي اثر على وجهي ولا كنت حلو .. <(( ايه هين ))

قالت مو مشكله اهم شي اسلوبك اعجبني .. قلت لها .. اشوى ان اعجبك شي فيني .. وطلبت منها انها توريني وجهها .. قالت طيب بس لا يشوفنا احد .. وانا اللي اغطي عليها .. قلت لها .. يالله بسرعه .. وهي اللي ترفع الغطوه .. وانا اللي اضحك .. قالت .. وش فيك تضحك ..؟ قلت لها .. يالله عاااد بدون استهبال ... قالت .. وش فيك ..؟

قلت لها .. يالله بسرعه شيلي القناع اللي على وجهك لا تستهبلين .. وهي اللي تقول هذا وجهي الصدقي يالقرد ... وانا اللي انصدم واحس ان الارض تدوور فيني .. وش ذا الوجه القبيح .. اوول مره اشوف وجه يطلع منه ريحه مخيسه .. نعن ابوها حتى الشجرة اللي كنا واقفين جنبها رفعت ثوبها وانحاشت ... وكل الشجر اللي كان حولنا انحاش وراح وقف في مكان ثاني بعيد من شين وجهها

وانا كنت حااط في بالي كلام رومنسي جلست عشرين دولار يوم احفظ فيه .. عشان اذا شفتها اقووله لها .. بس يوم شفت وجهها اللي كنه وجه وااحد جالس في مجلس رجاجيل وفيه اسهال .. وضيعت كل الكلام الي حفظته وقمت الخبط في الكلام .. سألتها .. ..؟

.. طيب وش هالببسي اللي مكبوب على ثوبك ..؟

جاوبتني .. هذا موب ببسي هذا مرق

سألتها .. طيب ماعندك غير هالثوب ..؟

جاوبتني .. الا كان عندي بس انسرق

سألتها .. طيب مادامك شينه وشهوله تغازلين ..؟

جاوبتني .. انا كنت حلوه .. بس ان وجهي انحرق

وسألتني .. وش رايك فيني ماشابه باسكال ..؟

انتي جسمك جسم باسكال .. بس الوجه الله خلق وفررق

المهم .. اني ماقدرت اتحمل وجهها وقلت لها .. انتي جدك الاكبر كان غوريلا ..؟ قالت لي .. لا تتطنز انت ووجهك .. انا اول كنت مصدقه ان الديناصورات انقرضت .. بس من يوم شفت وجهك عررفت ان هالكلام اشاعات .. اشاعات .. قلت لها .. شوفي ياآنسه جراده .. .. انا ودي اجاملك واقولك كلام حلو .. بس وجهك يقول ماااااااااالك امل .. قالت لي .. والله حتى انا بعد ودي اقولك كلام حلو .. بس وجهك مايساعد .. وجهك كنه دعايه لا للمخدرات

المهم .. ان كل واحد منا تفل في وجه الثاني ورحنا .. وانا من الصدمه توقف تفكيري .. كل آمالي واحلامي راحت ادراج الدوااليب .. وركبت السياره .. ورجعت للبيت وانا متحطم .. وكنت متخيلها مثل مايا نصري ولا اليسا ..وطلعت مثل فطومه .. لااااا ... خلاص ماعاد ابي اتعرف على بنات <(( تكفى اخر مرره ..حرام تحطم قلوب المعجبات ياراغب علامه .. اقول انطم بس ))

الوكاد .. اني سكررت باب الغرفه .. ونمت نومة عدوكم .. <(( مسوي علوم رجال ))

ومادريت اليوم الثاني الا باللي يرفس الباب .. وانا اللي انقز من فراشي .. وش السالفه يالربع ..؟


الا وهو ابوي يصايح .. افتح يالسمرمدي .. افتح لابارك الله فيك .. وانا اللي افتح الباب .. الا وابوي في ووجهي ووجه مايطمن .. ويطلع ذيك العجرررا من مخباه .. وانواع التلحيط .. واخواني وامي واقفين عند البااب يتفرجون الانذال .. من لقاها مصارعه على الطبيعه .. المهم .. ان ابوي شغاال ضررب فيني ويقول ...تتزوج من ورانا يالخسيس .. قلت له .. والله ماتزوجت .. قال .. الا .. لان الشاليهات اتصلو علينا وقالو خلو مصيول يجي ياخذ زوجته اللي نساها امس .. وانا اللي تضيع علومي .. ابي افهم ابوي السالفه .. بس انه شغاال ضررب فيني .. ماترك لي فرصه .. وبعد جهد جهيد قدرت انفك من ابوي .. ورحت لاخر الغرفه ..وياخذ ابوي نعال يرميها علي .. وانا اللي اوخر عنها بسرررعه .. وامسكها بفمي <((متأثر بالافلام ))

واخواني يووم شافوني سويت هالحركه وهم اللي يصفقون ويصفرون لي .. وانا اللي اتحمس .. وانط على ابوي وامسكه مسكه منووومه ..<(( خربها الغبي مع ابووه ))

وينط واحد من اخواني ويمسك يد ابوي ويرفعها اول مرره وطاحت ويرفعها ثاني مرره وطاحت .. ويرفعها ثالث مره وطااحـ.... لااا لااا لااا لاا غير معقوول ... رفع ابوي يده وقاام يأشر باصبعه يعني لااا تراني مانمت .. ويوم شفته مانام .. وانا اللي اقوم وامسك ارجوله .. واسووي له حركه مقصيه عشان يستسلم .. بس ماستسلم .. واخواني يقنعونه انه يستسلم بس هو عنيد يحاول يزحف عند الحبال .. بس انا ماخليته ينفس .. وفجاه .. اووه .. لا تدخل خاارجي .. امي جابت المقلااه ومحطتني على جبهتي محطه مدووووويه .. وتدخلوو اخواني ومسكو امي وطلعوها برا الحلبه ..<(( عائله دلووخ ))

المهم .. اني دخت وماعاد ادري وين انا وطحت مكااني .. ويزحف ابووي بشويش .. ويحط يده على صدري .. ويعدون اخواني ..

واحد

ثنين

ثلاثه .. فاااااااز ابوووي... هييييييييييييييييه < ((الحمدالله والشكر ))


المهم .. اني فهمت ابوي السالفه <(( مااصلح في جريات ابد اعلم واكع على طوول ))

ونمر بيت ابو عبدوش ونعلمه وانواع التمحيط فيني .. المهم انا وصلنا الشاليهات وقلت له معي لك مفاجاة وهو اللي يضحك وقال ... والله اني خابرك ذيب ماتترك خويك كذا الرجاال ولا بلاش .. وانا اقول في صدري ايه هين وهو يقول اكيد بتعرفني على وحده من خواتها .. قلت ايه انا بعرفك على وحده صحيه .. وهو يشوف المفاجاة بيفصخ العبااه قلت له .. خلها عليك كذا احسن (( انواع النذاله فيني ))

وصلنا السياره .. الااوابو ماسك مفك العجل في يده يحتري ولده .. وعبدوش من هوول الصدمة ماعاد شالته رجليه .. طااح مكانه وقام يصيح ويولول .. واستلمه ابوه انواع تفقيع الوجه وانوااع الترفيع والتنزيل .. وانا جالس اتفرج ومبسوووط .. مادريت الا ابوي ماسكني وانواع الرركب .. وانا اللي اصيح فيه .. هيه يابو الشباب .. حلا هي ..؟ توك طاقني قبل شوي ..!!

قال ابووي .. اييه صحيح .. بس عيب الرجال يطق ولده وانا جالس اتفرج .. لازم اسووي شي انا بعد <(( لااصراحه ان ابوي فااهم في الاصول .. طالع لي ))

المهم .. عقب الطق اللي كليته انا وعبدووش تزاعلنا مع بعض .. وانا حرمت اتعرف على بناات .. ومثل ماقال المثل .. ابعد عن الشر ياعمري وغني لوووووه ..ودان دان داانه داان وااويلووه مشكلني حبك يااروح الروح مشكلني .. يالبيه يالبنات الي مع راشد الماجد في الفديو ارووح معهم طحينيه < (( شكله ماتاب ناوي ينطق مرره ثانيه ))


وتوته توته خلصت الحتوته اتمنى انها اعجبتكم واسفين على الاطاله
:sm291:

[نبض الأمل]

خخخخخخخخ
اقووول وش جايك على المحششين هاااا.....

[الهاوي173]

ربعي هههه زي ماقالت ليدي مروج

[شَ ـآعُ ـٌر ٍ مُـً ِش‘ـًآعٌ َـْر ِ]

ههههههههههههههههه

مضبط له بوب الظاهر خخخخخخ

[نزفـ المشاعرـر]

خخخخخخخخخخخخخخخخخخخخخ

[الهاوي173]

مشكورريين على مروركم العسلي

[ღĄ7Łặ ŁǿνΣღ]

هههههههههههههههههههههههههه

والله هالمحششين عجايب

[الهاوي173]

مشكوره على مرورك

[بقايا شوق]

هههههههههههههههههههههههههه
ههههههههههههههههههههههههههههههههههه
>>>> ميته ضحكـــ ..
وربي محشش فااصل بقوووه ..
يعطيك الف عاافيه الهاوي ..

[الهاوي173]

مشكوره على مرورك العسلي