ياطول ليل الشتا غديت من بردهٍ

[شَ ـآعُ ـٌر ٍ مُـً ِش‘ـًآعٌ َـْر ِ]

السلام عليكم :)

اشتقت للصرح العظيم هذاٍ

وجيت وجايب معي قصيدهٍ عساها تنول ع اعجابكمٍ

.......

شكرا وكل الشكر ياصاحبي وده

للي خذا من سنيني معظم اوقاتي

ما اشره ولكن دروس الوقت مرتده

تسوق خالي الفكر والهم ويحاتي

الله عليها سنينٍ مانوى عده

وماكنت ابفرح لبعده كانه ب ياتي

عقلن حكمته بحبك شاله وهده

قلبن ذبحه الغلا واستوحد ابياتي

ياوجد حالي ووجود العود من قده

حده زمانه يشابه منهو سواتي

مبطي وانا ساتره مابحت له سده

والحين اشوف البشر تقصد بوناتي

ولا وجودي كما رجلٍ على خده

دمعت قهر عاندت كل المسافاتي

ياطول ليل الشتا غديت من برده

عود وهبوب الجنوب ببرده العاتي

ياعز حالي على الهقوات والشده

ماعاد لي حيل وزادت انكساراتي

كل مالفيت الـ عزيزٍ قومه يصده

صكات بقعا تسمت لجل اهاتي

لو عاد فيني الزمن والله لـ اهده

واسوق قدمي شمال بكل وجهاتي

ان كان هذا الغلا يقطع ابو جده

يقطع دروب الهوى في كل روحاتي

قنعت من جورها والنفس منسده

ولا يجفل الا اللذي مثله معاناتي

ياما سهرت بليالي حيل مسوده

كني ضريرٍ احاول لم نظراتي

يسوقني جامج الاحساس واكده

وينصاع فكري ذليل بطيب نياتي

مازان علم ٍ جميل وكنت انا ضده

مير الحقيقه يزاحم حزني اوقاتي

ساعات اشوف البشر مرات مرتده

واشك ب النفس والهقوات ساعاتي

الله يصبر صويب ٍ طالت المده

عليه واقفى ينوح بكل كلماتي ..


قلمي : ماجد المغيره

...

وسلامة من يقرا

[وادي حنيفة]

يا ابن المغيرة .. غارت علينا خيول شعرك مغيرة .. نص مذهل .. بدع رائع ..
تسلسل جميل في كتابة القصيدة , ومعاني أنيقة
تحياتي للماجد ماجد ...

[شَ ـآعُ ـٌر ٍ مُـً ِش‘ـًآعٌ َـْر ِ]

الاروع وجودك اخوي وادي

الله يرفع مقامك ولاهنت ع الاطراء الجميلٍ

[نبض الأمل]

ياعز حالي على الهقوات والشده

ماعاد لي حيل وزادت انكساراتي

كل مالفيت الـ عزيزٍ قومه يصده

صكات بقعا تسمت لجل اهاتي


الله الله عليك
أسعدتنا من بعد غياب ، دائما بوحك بالصميم

صح لسانك ودام قلمك وماننحرم من روائع ابداعك
وشهادتي فيك مجروحه شاعرنا
/

[شَ ـآعُ ـٌر ٍ مُـً ِش‘ـًآعٌ َـْر ِ]

استاذتي نبض ٍ

ماغاب من حضر بقلوبكم ..

صح بدنك وصح كلك ٍ

الف شكر ع ردك اللي اسعدني .

[اسماء الشدي]

بسم الله الرحمن الرحيم
ماشاء الله .. نص مفعم بالحركة والجلجلة .. وجاء بنفس واحد , ورتم إيقاعي آسر.
يجبرك النص على قراءته أكثر من مرة , وكلما عاودت الكرة تجده متجدداً ونابضاً , نعم من طول الغيبات جاب الغنايم , وقد ( جاب ) ابن المغيرة هذه الغنيمة الفاخرة من معركة الشعر التي أسفرت عن كسبه لهذه القصيدة الثمينة00
وصح لسانك 00

[الفضلي]

ياطول ليل الشتا غديت من برده

عود وهبوب الجنوب ببرده العاتي

صح لسانك واعتلا شانك

نص مميز وفريد كله أحاسيس جيّاشه نص فيه من التصوير الرائع الشيء الكثير


دمت مبدعاً ومتألقاً يابن المغيرة

لك مني أجمل تحية

[شَ ـآعُ ـٌر ٍ مُـً ِش‘ـًآعٌ َـْر ِ]

استاذه اسماء .

اخجلني ردك واطراءك الجميل

واعترف انه زرع في نفسي التفاؤل والتقدم للامام

الف شكر لك وصح بدنك ولا هنتي استاذتي ..

[شَ ـآعُ ـٌر ٍ مُـً ِش‘ـًآعٌ َـْر ِ]

الفضلي

هذي شهاده اعتز فيها

وافتخر اذا انت انعجبت ب ابياتي

صح بدنك استاذي ولا هنت ..

[بالصبر تنال]

ياعز حالي على الهقوات والشده

ماعاد لي حيل وزادت انكساراتي

كل مالفيت الـ عزيزٍ قومه يصده

صكات بقعا تسمت لجل اهاتي
صح لسانك
قصيده رائعـه
وأتمنى لك التوفيــــق ~ وإلى الأمام