كنتاكي عشاي لأهلي الليله ومعه طبقين حياكم ربي

[مملكة الاحساس]

بسم الله الرحمن الرحيم

السلام عليكم ورحمة الله وبركاته

زمان عنه التصوير في المطبخ
من رمضان
بس اليوم قلت ابصور العشاء الي سويته حق اهلي
وانا من العصر في المطبخ الين الساعه 8
بس يستاهلون اهلي فديتهم
واهم شيء انه عجبهم
والحمدلله خلص الاكل

طبخت لهم دجاج كنتاكي وشرائح التوست بالجبن وكيك
صراحه صورت كل الخطوات من هالثلاث الاطباق
بس عجزانه وتعبانه احمل كل الصور
بس قلت اكتفي بالصورة النهائية لاني الحين اعيوني مثل كذا
وبيني وبين النوم

ابتدي معكم الطبق الاول
دجاج كنتاكي

اولا سلقت الدجاج والدجاج على حسب الافراد حطيت مع موية السلق دارسين وورق غار واشوي بهارات
بعد السلق خلطت خلطه عباره عن زبادي وخل واشوي مايونيز وفلفل اسود وملح وثوم بودرة
بعدها خلطت هالخلطه مع الدجاج وحطيته شوي بالثلاجه
جهزت طحين وحطيت اشوي معه فلفل اسود وملح وثوم بودرة وشوي بهارات وجهزت البيض وحطيت بعد معه اشوي ملح وفلفل اسود
بعد ماطلعت الدجاج من الثلاجه غمسته بالطحين بعدين بيض بعدين طحين بعدها خليته شوي علشان تتماسك الخلطه بعدها قليته
وقليت معه بطاطس
وقدمت معه كاتشب والثومية
والثوميه مقاديرها هي
بطاطس مسلوقه وثوم مهروس وفلفل اسود واشوي ثوم بودرة وملح ومايونيز وزبادي وكلها بالخلاط وبس
.................................................. .......
الطبق الثاني الي قدمته لهم
شرائح التوست بالجبن

وهو سهل جدا ينفع فطور وينفع عشاء خفيف
جبت توست وحطيته بالصينية
وجبت لي صحن حطيت فيه جبنة كرافت مبشورة وجبن سائل وكزبرة واذا بغيتوا بقدونس انا ماكان عندي بقدونس واشوي مايونيز وزيتون اسود شرائح وفلفل اخضر وملح واشوي بهارات والي عنده فلفل مجروش يحط معه للي يحب الحار خلطت المقادير كلهم وحطيتهم على شرائح التوست وبعدها بالفرن ونشغل الفرن من فوق وتحت وننتبه لها لانها بسرعه تستوي وبعد ماتستوي نقطعها مثلثات ونقدمها
بس خلاص

.................................................. ..
والطبق الثالث هو
كيك بني بكريمة بيضاء

وهنا تورطت
جبت كيك ابيض علبتين وجهزت مقاديرهم من بيض وزيت وماي وحطيت العلبه الاولى علشان اخلطها وبعدها اخلط الثانيه اكتشفت ان العلبه الثانيه كاكاو مو كيك ابيض بس قلت يالله خليني اجرب وخلطتهم مع بعض وطلع اللون كله بني والطعم شيء كيك بني خفيف مو ثقيل بس حلو طعمها واشوى ان اختراعي ما فشل سويت له كريمه سريعه وزينته بهرشي وحبوب الفارمسيل بالكاكاو وبس خلاص

دجاج كنتاكي مع البطاطس والكاتشب والثومية

وهذا عشاء مصغر يجمع 3 اطباق

بس خلاص خلصت
وعليكم بالعافيه
والحمدلله الذي أطعمنا وسقانا من غير حول منا ولاقوة