تابع القصيـدة التراثية / حنين إلى المــــاضي

[عبدالرحمن الغريب]

ألا يا هاجسي شوّقت قلبي=إلى ذكراي في ( ثبر الجدولي)
إلى ذكراي في( جسر الغدير)=وشوف الماي يسري للوحولي
وعين (اجنيدة) اللي كنت اجي لـْـها=أراها كنها لي بالمثولي
وعين (الريّس) وذكرى حياتها=يوم ٍ الناس باحماها تجولي
وذكرى ( القوع) والسمرات عنده=عقب ما يرخي الليل السدولي
وذكرى( القنطرة) ما راح عني=ولا ذكرى المواقع والسهولي
ولا ذكر الليال الماضيات= مع الأتراب في لعب ٍ وجولي
ينادينا القمر لـ اسفر علينا=ونلهي باللعب فوق التـلولي
لـ كن (الطعس) مفروش ٍ بفضة=على سطحه وحنّا به نزولي
ندوسه ما نَعَـرْ ف انه كرامة= ونلعب فيه( شعرور ٍ ) و (هولي)
وفي البرحات ما بين المنازل= وكلْ منا على ربعه قبولي
مقبلين ٍ لعبنا ما نملـّـه=ولا فينا زعول ٍ أو ملولي
ولا فينا من اللي به خداعة=ولا اللي هو من اصحابه خجولي
==
ألا يازين ذاك الليل لـ اقبل=ولبـّد في ظلامه كل زولي
يزيـّـنْه السكون اللي بدا به=ولو كانت خراميسه تهولي
يبددها السراج اللي نشبه=وتسيـّرنا على ذولا وذولي
ويبددها النجر لـ قام يلعي=بصوت ٍ يجلب القـلب العـلولي
يدقه واحد ٍ يبغي الاناسة=ولا عـلــّـّق على بابه قفولي
يبه ايلا لذع نجره يجونه=على الترداد وافين العـقولي
يقهويهم من الفنجال الاشقر=ويكرمهم على حسب الأصولي