معاناة أم

[غلا العيون]

هذه المعاناه نقلتها من اذاعه قطريه منذ اكثر من خمس سنوات ولازلت احتفظ بها .. فأحببت نقلها لكم ..
لشخص يدعى جاسم صفر..

بعد كل سجده وسجده

بعد تسبيحه وبعد حمده..

رغم الحال وشقا الاحوال ...

بعد ماشفت من اوليدي .. كل الظلم والاهوال ..

أرفع ايدي من قلبي .. واقول : يارب تهنيه وتسعده..

رغم اني بوفا ربيت...

رغم اني ماقصرت .. نعم ووفيت..

نعم رغم العمر كله .. يعاملني بالنكران ..

يجازيني ضناي ...بالطرد و الحقران..

كأني ماحملته ف يوم ..تسع شهور في بطني

يجي اليوم ويطردني !!!

كأني اّنا مب أمه ..!!

كأنه صدري ماضمه ..

كأن الحليب اللي سكن دمه ..بعد هالعمر ياناس ماهمه

بعد عمري ياوليدي تنكر لي ..

طردني بكلمه ماتنقال

يقول : بيته الجديد بيضاق

يقول : إنه عجز يصرف على أمه ... بلقيمه

يقول اني عنده صرت بلا قيمه

ماهمه حرقة دموعي .. أنا أتوسل ولا يوعي ..

أبوس ترابه وريوله

حبيبي يلبعد عمري ..

أنا يا امك ضعيفه اليوم .. مشلوله ..

فديتك خلني في بيتك.. لو في حجره معزوله..

أخدمك اّنا بعيوني..

أعيش لك مثل ماتبي .. لو تبيني خدامه

أنا ماهمني شي في الدنيا ..أبي شوفتك يمي

أبي ما اموت وانت بعيد ..عمري مابقى فيه شي من أيامه

ليش اتصر على حبي بعدامه ..

نسيت أني اّنا أمك ؟!

أنا كتله من الاحساس انسانه

أنا أبغي العطف منك .. أبي حبك عليه أشقد ولهانه

أبي صدري يضمك يابعد عمري .. أبي أرتاح ..

أنا ياوليدي تعبانه

حسبته بيمسح دموعي ..

حسبته بيخف من روعي ..

حسبته بيحضن قليبي..

واحس بيده على ضلوعي..

قال : أكيد أنتي خرفتي ..

أكيد اليوم عقلك ضاع ميزانه

ياموتي .. يقول أني ما أشرفه عند أنسابه وجيرانه

يقول : مرته عليه اليوم زعلانه

وقال أنا تهمني مصلحة مرتي

أنتي مشكله صرتي

أنتي اشفيك ..بيتي ضاق مانبيك

دوري لك مكان ذلفي ...نبي منك الفكه

أبي أرتاح أنا ومرتي ... وف ويهي باب بيته بغضب صكه

و أنا اللي لشوفته أشتاق

وياموتي !! يجي صوبي ...يدفني من طرف ثوبي

ألا ياحزني يامصيبه !!!

رفع إيده يبي يجازيني بكم طراق

نعم زوجتي ماتبيك .. وجودك صار ماينطاق

وبعد كل اللي سواه ضناي اهوه ما أنساه

وبعد كل اللي سواه دعاي اهوه ما أنساه

وبعد كل سجده وسجده

بعد تسبيحه وبعد حمده

بعد الحال وشقا الاحوال

بعد ماشفت من اوليدي كل الظلم والاهوال

أرفع ايدي من قلبي .. واقول : يارب تهنيه وتسعده .



فضل الام عظيم أتمنى من الكل عدم العقوق والقيام بها وبشؤونها جزيتم الجنه