قصة البربري

[مـ ج ـبور]

بسم الله الرحمن الرحيم
السلام عليكم ورحمة الله وبركاته اما بعد:

اليكم قصة البربري مره من المرات انا مع ربعي طلعنا في مكشات كلنا زملاء مكتب وموافق هاك السنه ربيع بالحيل
قريب من الرياض وطاعنا ,حنا نجي خمسه او سته ترا اذا كثروا الناس في المكشات اكثر ثمانيه مثلا تختلف الاراء واحد يقول نبي الشجره ذيك وواحد يقول لا هناك واحد يقول نبي خيمه واحد يقول نبي نقنص مناك وواحد لا من هنا ,اما اذا كانوا شويين يتفقون بالراي المهم ان طلعنا واخذنا معنا فراش من المكتب اسمه ابو راشد وحنا بارينه وهو حبيب ونشمي وعشير نشاما يغسل القدور ويشارك معنا في الطبخ ويسوي القهوة.
الحاصل يوم جينا نبي ناخذ ذبيحه او ذبيحتين قلنا وش رايكم ناخذ ذبايح نجد قال واحد نجد وشو له وثنتين بعد النجد الثنتين غاليات يالله لو نبيهن ضحايا دورروا لنل ذبيحات عاديه قلنا ناخذ من نجد الشام وحنا يمكن نقعد اربعة ايام حتى لو جبنا نجدي بيصيرن راهيات علينا قال واحد وش رايكم ناخذ برابر ,المهم رحنا للسوق خذنا من ها البرابري جلده اسود وراسه ابيض وذنبته صغيره كنها الي تجي على القبع والبربري حليل زين بس ماتدري عنه الكبر والصغر مايظهر لو تصفهم مايبين منهن اللي عليه الكبر الحاصل خذنا خمسه شريناهن من واحد في مجلبه الغنم وطلعنا العصر في هكا الروضه الي ماعندك احسن منها بتجلس ونصبنا خيمتنا قال هاللي جايبينه معنا وش تبون العشاء قلنا سليق وضبط السليق خله ناعم مره كنه مخ جربوع والا الغنم محطوطه في شبك جايبينه معنا والبربري غثيث لو انطلق منك ماعد تجيبه الى انطلق كنه فشقه من بندق لا عاد تدورهالا كانك تبي تدعسه الحاصل جمعناهن في هكالشبك والا الارض ربيع واثر الغنم ضعاف ماهن سمان قال واحد اطلقوهن يرعن قال الاخر لالا بس خلوهن في شبكهن وولعو عليهم اللمبات على شان يشوفن العشب لان البربري مايرفع راسه بس ياكل وهو مدنق قبل,وخلوهن يرعن هاك الليله في الشبك قالوا ايه اللي ناخذ منهن للعشا اياهن اكبر اياهن اصغر قلنا شف هالصغير خذه,تطيح عينه على واحد قلنا هذا هو اصغرهن خذه وذبحه والاابو راشد دبق ولبق سريع ووذف سريع تصدق انه يذبح الذبيحه وثوبه مايجيه نقطة دم ولايجيه شي من خفته ووذافته حتى رجليه مايجيها شي