ماندري وش اللي صار

[الـمـهـاجـر]

وش اللي صار ما ندري .. ولا ندري وش اللي صار

ولا ندري وش اللي بالليال المقبلات يصير

تعلّمنا من إسرار الحياة .. إن الحياة أسرار

وتفسير الحقيقة .. بالحقيقة مالها تفسير

ومن غدر الزمن كلٍ يقول إن الزمن غدار

فكم ممسي على قمة جبل وأصبح بقاعة بير

ومن مكر البشر كلٍ يقول ابن البشر مكار

فكم بالناس حامل مسك وكم بالناس نافخ كير

صحيح إن الصحيح أصبح خطا والعار ردّ العار

ولكن مالنا حيله ولا نقوى على التغيير

نشوف اللي نشوفه من مصايب واليدين قصار

تحت رحمة رحيم وفي رجا الله والي التدبير

نسوق العِير بأمر الله ونمشي لآخر المشوار

وعلم الغيب عند الله وبأمر الله تسير العِير

نعايش وقتنا ونسايره ونقول يا ستار

علينا تستر بسترك وبأمرك يا لله التيسير

نفكر بالليالي والليالي تفحت الأفكار

ولازلنا نفكر كيف ممكن نترك التفكير

وش اللي صار ما ندري .. ولا ندري وش اللي صار

ولكن كل شيٍ ممكن انه بالحياة يصير

؛؛؛؛