كيكة الشابورة.... ولأول مرة من مطبخنا......

[مملكة الاحساس]

بسم الله الرحمن الرحيم

السلام عليكم ورحمة الله وبركاته

أحيانا تطري على الواحد شغلات في اوقات مالها داعي...
واوقات لها داعي
بس هذه احلى شيء لما الواحد يستعد
حق جميع الاحوال بالعدة والعتاد>>>>>>داخلين حرب
اليوم الفجر الساعة 3 قررت اصلح لبيتنا كيكة الشابورة شفت طريقتها بأحد المنتديات بس بدون صور
وكانت المقادير سهله ومتوفرة في البيت بس انا ضاعفت الكمية مرتين علشان اهلي حبايبي
وبما اني اول مرة انزل موضوع مثل كذا
قلت لازم انزله في اول ملتقى عزيز على قلبي
>>>ياكثر ماتسولفين
طبعا اول شيء انصحكم فيه انكم تشغلون الفرن على نار متوسطة
بالنسبة للمقادير:
اذا تبغون تسونها قليله اخذوا من كل شيء نصفه
اترككم مع المقادير والطريقة.>>واخيرا

-2كاس طحين
-4 بيضات
-نصف كوب زيت
-6 ملاعق حليب بودرة
-2 ملعقة صغيرة فانيليا غير ممتلئة
-2ملعقة طعام بيكنج بودر غير ممتلئة
-كاس ماء
ثلاثة ارباع الكاس سكر>>>> انا هنا استخدمت سكر بودرة علشان يختلط بسرعة مع المقادير ولازم تراعون ان سكر البودرة غير عن السكر الي مو مطحون السكر البودرة هنا ثلات ارباع بس بطريقة الاخت سكر مو بودرة اذا بغيتوه حالي زيدوا الكمية بس انا مازدتها مابغيتها حاليه علشان الوالد والوالدة
باختصار حطوا سكر على كيفكم ومثل ماتحبون.
-سمسم وحبة سوداء للوجة واذا بغيتوا حلوه {شمر}

الطريقة:

نخلط جميع المقادير ماعدا الي راح نحطهم بالوجه السمسم والحبة السوداء
طبعا تبغون تخلطونها بالسلك اليدوي ولا بالسلك الكهربائي كله ينفع

لين يصير مثل كذا وتتجانس المكونات مع بعضها البعض
>>>>>>>>> هناحسيت اني منال العالم

ناخذ صينية وندهنها بااشوي زيت ورشة طحين علشان ما تلتصق الكيكة بالصينية والافضل تكون الصينية زجاج علشان نشوفها من جميع النواحي اذا استوت .

ونرش الوجه بسمسم والحبة السوداء على حسب ماتحبون وندخلها الفرن والوقت على حسب ماتحبون انا تقريبا اخذت نصف ساعةوياليت تكون الصينية بالوسط وعلى نار متوسطة...
ولا تفتحون الفرن في العشر الدقايق الاولى علشان ماتخرب الكيكة بعد ربع ساعة او اكثر يمكنكم غرس سكينة بداخل الكيكة طبعا اذا طلعت السكينة فيها عجين اشوي معناها لسى باقي عليها واذا طلعت ناشفة معناتها استوت شغلوا الفرن من فوق وحمروها على حسب ماتحبون.
بس لاتحترق عليكم

طلعتها من الفرن بس مادري كيف جاي شكل الصينية
وياسلام على السمسم والرائحة الزكية
تاخذك لمكان بعيد كأني بمكة وبالتحديد بالشبيكة وفطورها وايامها الي ماننساها.

وهذه جانب الصينية.... نسيت هالصورة ورجعت علشان احطها

شيء قطعته مكعبات

وشيء قطعته بالطول

وياسلام مع قوة الصباح ..... وشاي الضحى

ولا الطعم خيال مع كوب شاي بالحليب

يووووووه واخيرا خلصت
اتمنى يعجبكم
وصحتين وهنا


الي بتنقله من احد المنتديات عليها بالعافية

طابت لياليكم وايامكم بالأفراح