حلا بسكوت بالكاكاو.......حلا ولا أسهل منه

[مملكة الاحساس]

بسم الله الرحمن الرحيم
السلام عليكم ورحمة الله وبركاته
مبارك عليكم الشهر
هالحلا لذيذ على الرغم انه بسيط بمكوناته ومايحتاج تعب
بس بيتنا مايستغنون عنه ولازم بين فتره وفتره انسويه
ادري فيه حلويات واصناف أكثر فخامه منه والذ طعم
بس هالحلا غير ومهم بالنسبه لبيتنا
والسبب يرجع لكونه اول حلا عرفناه من حنا صغار
من أنا في خامس أبتدائي وانا أسويه>>>>>>قديمة أنا
طبعا الحلويات الي كنا نعرفها قبل كانت مهلبيه او جلي او ساقو
وهذا الحلا الجميل اول حلا اصلحه بنفسي>>>الي يشوفني يقول مخترعه جهاز
المويهيم هو عبارة عن طبقات من البسكوتات وطبقات من خليط الكاكاو
اول كنت اسويه على 3 مراحل>>>>>> مدرسة هذا مو حلا
يعني طبقه بسكوت وطبقه كاكاو وهكذا 3 في 3
بس حاليا اسوي طبقات البسكوت كلها بعدها خليط الكاكاو وهذه الطريقة أسهل وأوفر

طبقات البسكوت ماتغيرت مع مرور الزمن .... كلها بسكوت مغمس في حليب سائل اي نوع
اما الطبقه الثانية:
وهي خليط الكاكاو كانت فقط عباره عن سكر وكاكاو بودره وقشطه>>>وما اجملها من خلطه سهله ماتحتاج جهد

لكن حاليا بامكانكم تضيفون لها اي مقادير زياده وتبتكرون من عندكم
يالله تعالوا نشوف الحلا السهل الذيذ الجميل البسيط

المقادير والطريقة سوا...سوا


نحتاج الى حليب بودرة وماي مو مهم المقدار هو لتغميس فقط
انا حطيت تقريبا 3 ملاعق صغيره حليب وماي قارورة صغيرة
وبامكانكم استبداله بحليب بوني مخفف بماي

نغمس البسكوت في الحليب ونصفه مرتب بالصينيه وانتبهوا لاتطولون في تغميس البسكوت لانه راح يذوب بسرعه خصوصا هذا النوع الي استخدمته
أنا سويتها 3طبقات ومن الأفضل عدم زيادتها أكثر من ثلاث علشان مايصير ثقيل بعدين إذا صار ثقيل ماتقدرون تشيلونه
هههههههههههه أقصد ثقيل على المعدة


ماعليكم من الشكل أهم شيء الأخلاق>>>>>>
هههههههههه
لأن كل هذا راح يتغطى بغطوووة >>>>>> ياكثر السماجه بس
أقصد راح يتغطى بطبقه وفيره من الكاكاو
الطبقة الاخيرة :
خليط الكاكاو

3 ملاعق وسط كاكاو بودره
3ملاعق كبيره سكر بودره
2 قشطه
و2 مغلف دريم ويب>>>>بامكانكم الأستغناء عنه بس هو يعطي طبقه مخمليه للخليط
واهم شيء لاتكثرون من الكاكاو علشان مايطلع الخليط مر
وبامكانكم الزيادة والنقصان في هالخلطه بكل مقاديرها على حسب الكمية والصينية
وهالخلطه تصلح بعد صوص لتزيين الكيك وحلا الكاسات

نخلط المكونات مع بعض بخلاط الكيك او بالسلك اليدوي

ونصبه على طبقات البسكوت ونحطه بالثلاجة
وبس خلاص

ماقلت لكم سهل جدا

مرحلة التزيين مرحلة أختيارية مو ضروريه

البدائل السهلة:


هذه بدائل سهله وماتتعب للطبقة الثانية
بعد ماتصفوون البسكوتات تاخذون واحد من هالكريمات وتخلطونها بقشطه لتخفيف الكريمه وتصبون هالخليط على البسكوتات كطبقه اخيره
وبامكانكم تسوون خليط ابيض وخليط بني وتحطون هالخليط بالتناوب
يعني بعد البسكوت تحطون الخليط الابيض وتحطونه بالثلاجه ربع ساعة تجمد الطبقه وبعدها تطلعونه وتحطون طبقة الكاكاو او العكس
او تحطون خليط بني وتزينونه بخطوط بيضاء او العكس
بيطلع الحلا مميز وشكل وطعم جديد وزينوه اخيرا بسائل هرشي بالكاكاو اوبالتوفي الجاهز
ادري اهذر هبشات بس احاول اعطيكم كم طريقة واختراع لهذا الحلا
التزيين:
بكيفكم زينوا الحلا وباي شيء

أنا زينته بسائل هرشي
وحبيبات هرشي الي اسمها دموع هرشي>>>>>>حتى هرشي عنده دمووع
بس ما انصحكم بدموع هرشي لانها بتكلفكم مناديل كثيره
ههههههههههههههههههه
أقصد ماينفع هالكاكاو إلا حق بسكوت الكويكز ... فلاتحطونه أبرك لانه راح يكون قاسي إذا حطناه بالثلاجة
وهذا الحلا جاهز
7
7
7


وهذا أختي سوته بأول يوم برمضان


وهذا زينته بهرشي ومالتيزر





بس خلاص

أتمنى حلا الطفولة يعجبكم

وماعليكم من هذرتي الحلا جدا سهل وبسيط
ويارب تدوم هذه النعمة ويحفظها ربي من الزوال
آمين
والقادم أجمل إن شاءالله

أبو طلال معجب بهذا