(( سجل حضورك في بيت شعري ))

[كلمة حق]

يالمقفي ما لدّيت لخـلاف .. تطنيـش
وين انت رايح وانت .. وين انت عايش
مرّار في دربك .. سـوات المطاريـش
اتعبت رجلـك .. والركايـب عطايـش
ما خاف ذيبك .. من ضواري وتهويش
كشّـر لبـارودٍ .. بنـابـه وقـايـش
ما همّك العيشه .. ليا صـار بتعيـش
تابـع ورا التابـع .. لتابـع كدايـش
وشلون يالعاقـل .. مداهيلـك الطيـش
مير العجب .. عقلك فلا هـو بطايـش
ما يذبحك .. رمش العيـون البشايـش
ما يطربك .. مزمـار ودقّ المهابيـش
ما يطربك .. كود المـزون الرشايـش
يا محيّر العقّـال .. حيّرتهـم ليـش؟!
يا مجنّب الجهّـال .. ومهمـل ولايـش
يالشاعر اللي .. نبّش القـاف تنبيـش
يا مجدد المعنى .. ليـا صـار بايـش
لا ما عسرك القاف .. لكن على ويـش
تفتح لقافك بـاب .. وتفتـح درايـش
ويا مغنّي ما لدّيت لخلاف .. تطنيـش
غنّيت جرحٍ .. كل مـا صـار شايـش