أفضل طريقة للتعامل مع أبناء الجيل الثالث

[السندباد]

جيل النوكيا وجيل النيدو وجيل البامبرز



أعجبني الكاتب ابو عبد الرحمن في احد المنتديات عندما طرح موضوع للنقاش عن كيفية التعامل مع أبناء الجيل الجديد والجيل المدلل منذ نعومة اضافره .. والصراحة كان الرد شفاف وواقعي أخليكم مع الكاتب



أسمحو لي بالكلام على راحتي و بالعامية بصراحة عندك الأيام هذي جيل !!! ما تدري و شلون تتعامل معاه إن عطيته خفت عليه و إن منعته تخاف عليه أكثر

لكن مسألة الأب صارم وعيونه حمرا و أن الولد يرضى بالغصب الأيام هذي ما تنفع . اللي ينفع طال عمرك أنك تخاويه و تخليه يحس أنك قريب منه في كل الأوقات

المراهق في الأيام هذي يحتاج إلى شخص يستمع له يغدق عليه بالعطف و الحنان فهل يوجد أفضل من الأب أو الأخ الأكبر لتوفير ذلك ؟؟ أم نجعلهم فريسة سهله لذئاب الشوارع الجائعة

بالنسبة للسيارة ما أقدر أنصحك بشيء ، لأني ما أعرف و ضع الابن و من هم أصدقائه وما هي توجهاتهم و هل من أصدقائه من يهوى التفحيط الذي أنتشر هذه الأيام بشكل يصعب السيطرة عليه. أما بالنسبة للجوال لا تأخذ له رقم أو شريحة سوى " نهائياً " خذ له فاتورة و حد ائتماني 300 ريال و هذي بتصيد فيها عصفورين بحجر واحد

العصفور الأول : إطلاعك على فواتير مكالماته و معرفة أهم المكالمات و معرفة أصحابها. العصفور الثاني : بطاقة إعادة الشحن من الوسائل التي يتخدها ذئاب الشوارع في اصطياد المراهقين على سبيل التقرب و الهدايا " أشحن لك يا سنايدي و القير عايدي " في البداية حاول استغلال فرصة لمكافأة الإبن بالجوال كهدية ، مثلاً تفوق دراسي . وفر له أحدث جوال حتى لا يحس بالنقص بين أقرانه " هذي مهمة جداً " فيها عصفورين بحجر واحد " على فكرة العصافير جاها أنفلونزا طيور و إلا باقي " الله يستر كثرنا عصافير " العصفور الأول : إحساسه بالفخر فيك لأنك وفرت له شيء ثمين يفاخر فيه بين أقرانه. " أبوي أهداه لي "

العصفور الثاني : تمنع من يحاول استغلال عقدة النقص لديه من قبل ذئاب الشوارع . تتعامل معه من البداية بدون رسميات يعني تخلي الوضع بينك و بينه " فري" مثلاً تبدأ ترسل له مقاطع مضحكة و صور ساخرة و مقاطع صوت توعوية و تخليه يوريك اللي عنده و حاول في البداية أنك ما تطلب منه الجوال لا خله هو يرسل على كيفه

وحاول أنك ترسل له مقاطع فيها عضة و عبرة مثل مقاطع حوادث تفحيط حتى يعي خطورة هذا الأمر و بعد فترة تطلب منه بشكل مفاجئ تقول له " هاه وش عندك جديد خلني أشوف " و خذ الجوال منه و إسأله كذا على سبيل المزح " عسى ما فيه شيء كذا و إلا كذا " مع ضحكة صفراء و غمزة عين و دور بس إذا لقيت شيء " لا تعصب أو تضربه أنتبه " سوي نفسك ما شفت شيء بكل بساطة احذفها من جواله و خلاص يا دار ما دخلك شر

و إذا لقيت شيء مرة ثانية حاول إنك تعاتبه بأسلوب لبق بكلمات مثل : أفا يا أبو حميد " إذا كان اسمه محمد أو أحمد " أفا يا أبو عابد " إذا كان أسمه عبدالله أو عبدالرحمن " " أنت كذا زعلتني ما توقعتك تنزل نفسك للمستوى هذا ، كنت أتوقع أنك أرقى من كذا " صدقني من المرة الأولى اللي ما كلمته فيها راح يحس بخجل و ما راح يقدر يرفع رأسه في عينك من الحياء

و راح يحس بالغلط اللي سواه و يحاول أنه يرضيك حتى ما يخسرك و يخسر مخاواتك له لأن المراهق في هذه الأيام يحس بأن المجتمع كله ضده و بخاصة والده و من هم في سن والده و الأشياء هذه انتشرت انتشار النار في الهشيم و أصبحت شيء عادي عند الكثير من الكبار فما بالك بالصغار و اللي أطلبه منك باختصار أنك " تحط نفسك في مكانه و في عمره الحالي " و تسأل نفسك كيف تريد من والدك أن يتعامل معك ؟



هل توافق على هذا التعامل ؟

من وجهة نظري

نعم

[شَ ـآعُ ـٌر ٍ مُـً ِش‘ـًآعٌ َـْر ِ]

تبي الصراحه ياسندباد
تستاهل انقد خشمك

هذي المواضيع ولا بلاش


======================

ومن ناحية الفكره

انا معك في كل كلمه

لان هذي الايام صعب انك تمسك ولدك

واذا ماصادقته وخاويته بيصادق غيرك

والخوووووووف من غيرك

والله الصراحه ماخليت شي اقوله

معلوماتك طيبه جدا

مشكور يالسندبااااااد على الموضوع هذا

سسسسسسسسسسسيو

[السندباد]

:o اخجلتني

وتسلم يا الطيب على رايك

لا عدمنا تواصلك الحلو