لعنبو

[سعود العواد]

لعنبو

لعنبو حظي بهادنيا دمار
كل ماحاولت اعدل ماقويت

كل ماجيته يمين جاني يسار
مايطاوعني أشوف الحال ميت

دايم وجعان فاقد للقرار
درت كل الكون اعلاجه مالقيت

كم سهرت لين أشرقت شمس النهار
من ردى حظي على راسي هويت

كنت بالاول أمير عالي منار
عكس هذا اليوم ماكني بنيت

أنكرو ذيب الليال وضح النهار
يوم مات الحيل في اهمومي بقيت

عقب ما شان الدهر والوقت دار
مابقى لي عندهم حتى مبيت

يوم أنا في قوتي حولي جوار
يوم خذو مني عادوني مادريت

أحسب اني عندهم خوش اختيار
مادريت اني وسط شله غديت

الندم مايفيد لاضاع المسار
في الكبر مايفيد علمي لو قريت

كل ماسويت راح مثل الغبار
لين شاب القلب خسره وانتهيت

تكثر الاصحاب لا زان المدار
وتنقفض لاقل مالك يالبخيت

ياما سوينا على الطيبه عمار
لكن الانذال تنكر ماعطيت

لوعطيت الروح للخاين عقار
مايبين في الردي والجد هيت

كم بذلت جهدي معزه وافتخار
لكن الخاين تنكر ماسعيت

صاحب اسباع الصحاري والمغار
والردي كبه لو به ابتليت

السبع احسن من الظالم وقار
لاكرمته صار احسن ماخويت

الوفا لاهل الوفا لوكان ضار
يمكن في النخوه يجيلك لانخيت

الشاعر/سعود بن احمد العواد