وقفنا الملك فيصل(الحلقة الخامسة )من حكايات لا تنسي

[الجار]

أحبابي الكرام

السلام عليكم ورحمة الله وبركاته

وأسعد الله أوقاتكم بكل خير

نود أن نقدم لكم الاعتذار عن التأخير في أكمال حلقات

(حكايات لاتنسى )
مع الشيخ العم / محمد بن سعد الحصحوص

الذي نسأل الله له الشفاء والعافية وان يرجع للعيون سالماً غانماً من كل شر..قولو ..أمين

نعم الاعتذار لن يرضي الكثير..ولكن يعلم الله ان التأخير بسبب فقدان بعض التسجيلات.وحيث إن التسجيلات مسجله بتنوع وليس متسلسلة المواضيع أو مرتبة كما يراها القارئ، مكتوبة أمامه.بل لك أن تعلم انه لكي تخرج حلقة واحده ، نحتاج ان نستمع إلى جميع التسجيلات كي تكون الحلقة متكاملة و تغطي جميع جوانب المواضيع المطروحة فيها ومن ثما البحث عن الصور والشروح وتراجم بعض الشخصيات المذكورة في سياق حديث الشيخ (الحصحوص) شفاه الله والبسه ثوب الصحة والعافية..

وبحمد الله خرجت هذه الحلقة ، والحلقات القادمة أن شاءالله تخرج بانتظام ...

ونعلم ان الكثير من أبناء البلد يهمه ان نتواصل في عرض هذه الحلقات لما فيها من المعلومات الجديدة وحكايات عن حياة الأجداد وفيها عرفان لبعض الأسماءالتي يجهلها البعض..ونعدكم بالتواصل ان شاء الله.

محبكم في الله
الجار
سعود بن محمد بن صالح بن خليل الزعبي

الضيف في شبابه وهو يمسك صف عرضة في عرس قديم

ومثل ما قلت لكم قبل ، أعرست وجلست أربعة أيام مع زوجتي في بيت أهلها وبعد الأربعة الأيام (هجيت) ورحت (راس مشعاب)("1")

وجلست تسعة أ شهر أشتغل عند( أبن حميدان) تسعة شهور

عدله..وينتهي المشروع ويجيني( ابن حميدان) الله يذكره بالخير حي أو ميت .
قال: يا محمد؟
قلت : يالبيه.

قال: وش رأيك ندخلك الشركة(يقصد شركة التابلاين("2")
قلت : كثر الله خيرك.
وندخل( 52 )نفر ("3")كلنا دخلنا الشركة ..قال : هذه نمرتك("4").
وإلا النمرة (555 ) .
قال: باقي ثلاثة أيام (زهبوا)("5") انفسكم للسفر.
قلت : وين؟
قال: (تل الهبر)("6") ..يقصد (طريف)
قلت: طريف وأنا بزر وما ( أندل)("7") الشرق من الجبله ولا أقراء ولا أكتب.
قال : دور لك أثنين من ربعك.ويا الله هذيك طيارة تنتظركم .
طيارة (هولي كبتر) صغيرة ما تشيل إلا ثلاثة أنفار..ونركبها ونطير لطريف..
وتطري علي العيون وكأني واقف عند (عين سعود) بدخل لأهلي . و( عين سعود)..ذا الحين الناس يشفونها بر وكم أثله وإلا هاالمحل كان له شنه ورنه وصار فيه سوالف تذكر.

ملف العيون هذا هو محلة اليوم وجنبه ( عين سعود) هالأرض اللي جنوبي محطة وسمي وكانت هالعين حيه بالناس والمياهه..وذاك الحين ما فيه إلا هي وفيه بنزين محطوط في جراكل للي يبيغي أو ناقص عليه بنزين وهي موقف العيون ، وكان فيه حرمه يسمونها (هياء الحمرو) وسكنت في حجره وعريش سنين طويلة .
وفيها ثلاث عيان وكلها ما شاء الله ( ماي) حلو .
وكان يسكن فيها سعود المسعد("8") اللي عليه مسماه ، ساكن هو وأعياله. وكان علي المرشد("9") وباع بعدها، وفيها بعد سعد المسعد("10") كان نازل فيه قبل ما (يشد) للوزية.
ومن أول الناس توقف فيها وتأكل وتشرب وتتقهوى بعد كانت محطة عدله مثل محطات هاليومين ما فيه في الطريق الا هالمحل تريح الناس فيه.
الطريق اللي جبليه تحرك من محله الأولي شوي بس ولا هو نفسه طريق الناس من أول .للي بيروح (أبقيق )وجبليه (سكة الريل)("11") واذكر ذاك الزمن علينا الوقت عصير جاني (حسين)("12") .قال : فيك شدة؟
قلت : وش حقه؟
قال: الملك (سعود) هناك يوزع فلوس على الناس عند (عين سعود).

قلت : أنا توي جاي من سفر ولأني اقدر أروح. ويطير مع الناس من هل العيون والمراح على السكة اللي حافي واللي عليه نعل هم وحريمهم وبزرانهم .واللي عود بريال أو ثلاثة أو خمسة وأكثرهم حصل خمسة أريل ..وحسين عود ومعه 50 ريال حجر.ما عليه جيد.الله يرحم( الملك سعود) ويسكنه الجنة..إذا جا للحساء يجي بخيره من فضل الله ويلحقه خير ربي من المطر..وسموه الناس( ابو الخيرين).
وفي (عين سعود) وقفوا هالعيون( الملك فيصل )الله يرحمه..وهذه بعد سالفة ..أكيد تبغون تعرفونها.

الملك فيصل والأمير محمد رحمهم الله تعالى

هذا الله يحفظكم من كل شر..كنا جالسين ذاك اليوم ، يوم جمعة جالسين كذا ..(كنها هالساعة)..جلسنا عقب ما صلينا- الصلاة على النبي-ركض إبراهيم ولد أختي("13") يوزع( ورق) يقول: احنا راح نسوي حفلة( للملك فيصل)..اللي يشوفها يقول مجهزين لها من أسبوع وهي جايه كذا..قام أحمد المرشد("14") وجاب الدلال والحطب وجاب الطيب ويركض جميعة العصملي("15") يصيح ("16")في الناس اللي يبي الخير يظهر( يم)("17") (عين سعود) .
الله الله ...ما أخذنا ساعة إلا والدنيا (مصطكه)("18") كل هالعيون في (عين سعود) وكان (الملك فيصل) عازمة (سعود بن جلوي)("19")

الأمير سعود بن عبدالله بن جلوي آل سعود رحمه الله

أمير الشرقية في الدمام ووصل العلم لهل العيون بمرور( الملك فيصل)..المراد.. أقهوتنا استوت في نفس المحل وفرشنا الأرض (زوالي)("20") وسوينا مخيم..وراح حمد العثمان("21") ووقف هناك عند الوزية ومعه بندقه (ميز ر )او (صمعا)("22")

ناسيها والله.. وكان (عثمان الفارس)("23") هالرجال الموجود اليوم. ورا (عين سعود) بشوي ...ويوم شاف حمد العثمان سيارات (الملك فيصل) مقبله وهو( يثور)("24") بندقه ويسمعها عثمان الفارس ويصيح بطول صوته..يعلمنا.ان الملك أقبل ، وأول ما مر علينا من الموكب هو (قايد)("25") شرطة الحساء في ذاك الحين ينقاله (العويصي )ابو خالد("26")..تعدانا وراح قدام لين وصل (مفرق سكة الريل)("27") عند (الجديدة)("28") ويوم يفتر وراها ويشوف السيارات خافه من سرعتها وهو يجيك معود ورآه وأقبلت سيارة الملك وهالعيون متسلحين وحاطين السلاح جنوب وصفوا هالعيون صفين جنب( الخط)("29") وقربت سيارة الملك ويركض الله يبيح منه (محمد بن أحمد)("30") وأحمد(سنقيس يرحمهم جميع) ويحط (قطعة الزل )تحت باب السيارة و(يتل)("31") الباب وينزل الملك فيصل..والعرضة شغالة..يلعبون..
وأنا أقول لا تغيرون البيت لين يدبر الملك وعليه وعليه ..ووقف( الملك فيصل) وسلم ويسلم عليه الحاضرين .وذاك الطيب اللي يفوح ..أي والله كنها هالساعة..وإلا قائد الشرطة( العويصيى )راجع زعلان ومعصب .

يقول: وبدون عزيمة انتو وش سويتوا بدون عزيمة والملك مرتبط بعزيمة عند الأمير سعود بالدمام.ويلتفت عليه الأمير (محمد بن عبدالعزيز) الله يرحمه. ويقوله ولا كلمة والله ان دقت هالطبل تسوى عزيمتك في البلدية..يوم انه فشل..وخجل..و(حمد دخيل)("32") يقول للعويصى هاه يا ابو خالد دبرت ورحت حتى السلام ماسلمت. احنا ما نبيك راس المال عندنا (يقصد الملك فيصل).
ووصل حمد العثمان من عند الوزية وحنا نلعب..قال لا تغيرون..والعرضة أول لها أهلها ..سعود الكويتي وعمر العمره واللبي ماسك (العدة )ابو عواد أحمد.وغيرهم واجد الله يرحمهم جميع.
عاد يقلون ان الأمير سعود بن جلوي نشد عن التأخير وقال له الملك فيصل: لقيت لي قرية وقفوني .. اعترضوا السياره وتلوا الباب وحولوني .
قال ابن جلوي :هذولا هالعيون ..هذولا أسلاحك لا بغيت ..ويوم ثالث جانا (خط)("33") من الملك شكرا على سوينا...
ومفرق الريل وعين الجديدة اللي راح عندها( العويصي )هي كانت ن(قطة تفتيش) وما فيه طريق ألا منها على طريق ابقيق (غونان)("34") .

واذكر أول كان في النقطة رجال يشتغلون كلهم من أهل نجد..واحد أسمه سعد والثاني أخو سعد ابن هشره دوسري واحد اسمه راشد..والحجرتين اللي موجودين اليوم بناهم أخوي( فهد الحصحوص )("35")والخال( عبد الله بن أحمد وولده فهد العبد الله الثواب)("36") ..ماخذبنها مقاولة (قطوعة)("37") من الحكومة..بنو أول حجرة الطين وبعدين حجرة الحجر وسوو الرواق والمطبخ..وعين الجديدة مجابلتها ومن جا ذاك الحين يطب فيها يبرد على نفسه..

ولا يدخل الحساء إلا عن طريق هالنقطة.
ايه أيام..الحين الطيارة بتنزل في مطار طريف...
طولنا عليكم ..نكمل معكم المره الجاية.

================================================== =======================================

1- رأس مشعاب.وهو ميناء تم تأسيسه لاستقبال معدات شركة التابلاين .
2- التابلاين
أهدافه
نقل النفط إلى الأسواق الاستهلاكية في كل من أوروبا و الولايات المتحدة الأمريكية.
مسار الأنبوب
في البداية كان مخططا ان يكون مسار الأنبوب بداية من ابقيق في المنطقة الشرقية للسعودية نهاية بمينا حيفا في فلسطين ، لكن نشوء دولة إسرائيل في عام 1948 أدى إلى تعديل مسار الخط ليكون نهايته جنوبي صيدا بلبنان.
إنشاءه
بدء انشاء الانبوب بعام 1948 بطول 1600 كم بأمر من الملك عبد العزيز وقد تم إنشائه بشراكة ما بين شركة اسوEsso ، شيفرونChevronتكساكوTexaco و موبيلMobil . استعمل لإنشاء هذا الأنبوب 350000 طن من الأنابيب و 3000 قطة من الآليات ومعدات البناء وقد عمل على إنشاءه 16000 عامل بتكلفة قدرها 150 مليون دولار . تم الانتهاء من إنشاءه في عام 1950 وبعد شهرين من ذلك بدء ضخ النفط إلى ميناء صيدا.
أهم المضخات عليه
النعيرية
القيصومة
رفحاء
عرعر ( بدنة سابقا)
طريف ( وهي أخر محطة ضخ على الجانب السعودي)
إيقافه
تم إيقاف الضخ إلى صيدا بجنوب لبنان مع احتلال الإسرائيلي لهضبة الجولان الذي يمر بها الخط و ذلك في عام 1967.

3- نفر يقصد أفراد أو رجال وهي كلمة عربية فصيحة
4- النمرة رقمه الوظيفي.
5- أستعد
6- تل الهبر..ترمز إلى موضع وتل مرتفع عن الأرض شمال غرب طريف بجانب الحدود الأردنية السعودية ذكره الكثير من الشعراء في قصائدهم.
7- أندل يعني لا أعرف الجهات والأماكن
8- سعود المسعد رحمه الله والد كل من حمد (راعي البيرق) ومحمد المسعد.

9- أحمد محمد المرشد القرناس
10- يي
11- سكة الريل..سكة الحديد (القطار)
12- حسين بن علي الفزيع رحمه الله زوج أم زوجة العم محمد الحصحوص(حبيبة).
13- إبراهيم بن علي العطيش
14- أحمد بن محمد بن مرشد القرناس.
15- جمعة بن أحمد بن عثمان الغريب المعروف (بالعصملي) وكان مهمته منادي في المناسبات العامة وقضايا الأراضي.
16- يصيح ...ينادي.
17- يم...عند
18- مصطكة...المكان مزدحم من الناس بحيث لا تجد لك مكان.
19- الأمير سعود بن عبد الله بن جلوي بن تركي آل سعود أمير الأحساء ، بعد وفاة الأمير عبد الله بن جلوي أسندت إمارة الأحساء إلى ابنه الأكبر سعود بن عبد الله بن جلوي حتى عام 1372هـ ، عندما صدر أمر الملك عبد العزيز بنقل كرسي الإمارة من الأحساء إلى الدمام ، توفي عام 1385هـ.
20- زوالي: زل ..سجاد
21- الشاعر الكبير حمد بن عثمان الكبيسي رحمة الله.

22- نوع من البنادق القديمة والتي كانت تستخدم في ذلك الوقت وتعتبر الآن من البنادق التراثية.
23- عثمان بن علي بن حمد الفارس
24- يثور ..يطلق النار من بندقيته
25- قائد وهذا هو المسمى الذي كان يطلق على مدير الشرطة في ذلك الوقت.
26- الفريق أول عبدالعزيز بن أحمد العويصي مدير شرطة الأحساء والمنطقة الشرقية رحمه الله .
27- مفرق سكة الريل ..هو الآن مكان كوبري القطار عند المدينة الصناعية.
28- الجديدة أسم يطلق على الأرض والمزرعة الواقعة غرب المدينة الصناعية وتقطع على طريق الحساء ابقيق القديم.
29- الخط..الطريق.
30- محمد بن حمد بن أحمد المهناء رحمه الله
31- يتل..يسحب.
32- حمد بن دخيل العمر رحمة الله
33- خط او الخط يقصد هنا الرسالة او المكتوب.
34- غونان مركز أمني قديم على طريق الحساء ابقيق القديم.
35- فهد بن سعد الحصحوص رحمه الله.
36- عبد الله بن أحمد العمر الثواب والد راشد وفهد وسالم رحمهم الله
37- قطوعة..أي على مبلغ محدد ولفترة محددة
38- الأمير محمد بن عبد العزيز بن عبد الرحمن آل سعود ( 1328هـ / 1910 - 1409هـ / 1989) ولد في مدينة الرياض من عام 1328هـ . هو الابن الرابع من أبناء الملك عبد العزيز آل سعود الذكور, والدته هي الأميرة جوهرة بنت مساعد بن جلوي آل سعود ،نشأ تحت رعاية والده الملك عبد العزيز ودرس في مدرسة الأمراء وتعلم القراءة والكتابة وتعلم التاريخ والسياسة وحفظ القران الكريم حارب مع والده الملك عبد العزيز منّ معركة عسير وكان آنذاك عمره 12 عام و ساعد والده الملك عبد العزيز بحصار جدة وأرسله والده أثناء الحصار إلى القنفذة والمدينة المنورة وهو الذي فتحها وبعد ذلك عاد إلى الرياض ولكنه حارب مرة آخرة مع والده الملك عبد العزيز .
في السابع عشر من شهر صفر من العام 1409هـ / 1989م. توفي الأمير محمد بن عبد العزيز آل سعود, إثر نوبة قلبية, وكانت الصلاة عليه في 18صفر, , ودفنه في الجزء الجنوبي من مقبرة العود.

[صالح الربيع]

جزاك الله الف خير ياالجار والله يشفي الوالد محمدالحصحوص

[المـشتاق]

جزااك الله الف خير


والله يشفي الوالد محمد الحصحوص

[عاشق الجنان]

الله ماأحلاها من أيام
أعشق مثل هذه الذكريات
والقصص القديمة
شكراً لك أخي الجار

وأسأل الله الشافي أن يشفي
والدنا محمد الحصحوص

[عديل الروح]

الجآر

مشكور على هذهـ الجهود وعسآك ع القوهـ ان شاءاللهـ .. :)


وآسآل الله العظييم رب العرش العظيم ان يشفي وآلدنآآ محمد الحصوص


,,

[المشتاق للحرم]

الله ماأحلاها من أيام
أعشق مثل هذه الذكريات
والقصص القديمة
شكراً لك أخوي الجار


وأسأل الله الشافي أن يشفي
والدنا محمد الحصحوص

[الحــزن عــادة]

مشكـــــــــــــــ ــــور اخـــــــــــــــــــ ـــوي الجار
على الجهود المبذوله منك .. تسلم يمنــــ ـــاكــ

وادعو الله ان يشافي الوالد محمد الحصحوص




..؛.. الحـــ ــــزن عــــ ــــادة..؛..

[ناصر الثنيان]

أسْألُ اللَّهَ-عَزَّ وَ جَلَّ- أنْ يَمُنَّ بِالشِّفَاءِ وَالْعَافِيَةِ عَلَى وَالِدِنَا مُحَمَّدِ الْحُصْحُوصِ،

وَ شُكْراً أخِي الْجَارُ عَلَى حِرْصِكَ عَلَى تَوْثِيقِ هَذِهِ الْحِكَايَاتِ الْقَدِيمَةِ مِنْ صَمِيمِ

حَيَاةِ آبَائِنَا وَ أجْدَادِنَا؛لِتَكُونَ عِبْرَةً وَ تِذْكَاراً لِلْأجْيَالِ .

[°•¶ إحسـآسے ملكهے ¶•°]

حقيقهـ استمتعت جدا بقراءة الموضوع
راائعـ جدا بما فيهـ من ذكريات
حفظ الله العمـ محمد وأمدهـ بالصحهـ والعافيهـ
وسلمت يداكـ اخوي ع مجهودكـ الطيب
جعلهـ الله في ميزان حسناتكـ

[هاوي العيون]

جزااك الله الف خير


والله يشفي الوالد محمد الحصحوص