ماني خويالذيب لادنق الذيب

[سعودالدوله]

بسم اله الرحمن الرحيم

السلام عليكم ورحمة اله وبركاته


عذراا للانقطاع فموجة الشوق ساقتني الى شواطئكم

مازاد في قـدري سـلام وتراحيـب=ولاقل مـن شانـي جهالـة فراسـة
لي هامة تسمـو سمـو الشناخيـب=وتشيل حمل مثقل الصخـر ساسـة
واركي على الصالي ودوس اللواهيب=وبعد برجلي عـن دروب الهياسـه
ونفسي على الطيب تسوق المواجيب=سوقة غلا ماهـي بسوقـة بلاسـة
ونفسي على العليا تخطب المتاعيـب=حيث الفخر لالـه شيـوخ ودراسـة
ونفسي اجنبهـا جميـع العذاريـب=واحفـظ لسانـي لايـزل بغـلاسـة
ولامدهـا يمنـاي قصدالمطالـيـب=ولاذل نفسـي للعـذر والتمـاسـة
ولاني خوي الذيـب لادنـق الذيـب=انـا خـوي الذيـب لاهـز راسـة
ولاني من اللـي يستلـذ الاكاذيـب=ولاني من اللي نظرتـه باختلاسـة
واحشم وداري واقطع الشك والريـب=وان طبت لاني زرع ابوي وغراسـة
وان جيت مانـي علـة كالنواشيـب=اجي غمام المزن مـروي اليباسـة
وان شفت عيب من هل العيب ماعيب=اخـاف ثوبـي لاتجيـة النجـاسـة
ومن قو باسه هد عزمي المصاعيب=وخاوى ظلام الليل مـن قـو باسـه
وثنتين مالي عن حداهـن مكاسيـب=الاولـه ظلـي ولا رضـى مداسـه
والثانية لـو تبتلينـي المصاويـب=ابقى عزيـز لـو فقـدت الرياسـه
ومن آمن الدنيـا تجيـة العواقيـب=ويصبح غريب بيـن اهلـه وناسـه
المرجله ما هـي بجـذب الرعابيـب=المرجلـه ديـن وسلـوم وكياسـه
والمرجله نامـوس فتـل الاشانيـب=وكـل علـى قـده يفصـل مقاسـه
والعلـم مـا ينفـع بليـا تجاريـب=والحظ مـا يخـدم قليـل الحماسـه

خالص مودتي