الماندو الكوري

[أبو طلال]

البداية كانت من فيلم كارتوني إسمه كونغ فو باندا

دايم أشوفه يلتهم شي وعرفت من الفيلم وش إسمه
دورت عليه في النت ولقيت أنها طبخة شرق آسيوية بالعموم إسمها ( dumplings )
وكل بلد له طريقته في إعدادها
دايم يتكلم عنها رسلان وإسمها مشهور في الحجاز ( المنتو )
لكن بشكلها اللي في الفيلم طريقة كورية وإسمها ( جينبانغ ماندو )
Jjinppang mandu

الطريقة حسب اللي متبعها أنا هي كالتالي :

كوب ماء نصبه في بادية عشان نخلط العجين فيها
نضع نص ملعقة ملح
ملعقتين خميرة فورية
ملعقتين زيت
نمزج هذا كله مع بعض
نحط ثلاث أكواب طحين

نعجن الخليط هذا بالملعقة أول وبعدها باليد

نغطي العجين مدة أربعين دقيقة

بعدها بيكبر حجم العجين

أثناء هالمدة نقطع الخضار اللي هو :

مقدار كوب بصل أخضر مقطع مربعات صغار

نصف كوب جزر مقطع

نصف كوب خيار مقطع مربعات صغار

نصف كوب فاصوليا خضراء مقطعة

وعلبتين تونة
وكم فص ثوم مقطع

نخلط هذا كله مع بعض ونركنه على جنب

بعد إنقضاء الأربعين دقيقة للعجين
نرجع نعجنها من جديد عشان نبعد أي فقاعات هواء داخلها
بعدها نرجع نغطيها من جديد
أثناء التغطية الثانية
نحط خليط الخضار والتونة على النار
فقط عشان التونة مع الخضار يتمازج عصارة بعضهم البعض

نطفي النار ونخلي الخضار تبرد

إذا بردت نجيب العجين ونسويه رولة
ونقطعة إلى 16 قطعه صغيرة
وكل قطعة نرقها دائرة صغيرة

ونبدأ في حشو العجين
كل دائرة لها ملعقتين خضار أو حسب الرغبة

ونلفها على بعض عشان تكون الحشوة بالداخل
كل وطريقته في اللف بس كذا الطريقة الآسيوية هع

نجمع الأطراف بيد
وإبهام اليد الثانية نحشر الخضار في الداخل

لين تتسكر

ونحط كل وحدة داخل ورق الكب كيك عشان مايتلاصق
ونرصها في قدر مخصص للبخار
اللي ماعنده يخلي الشغل في مشخال ويحطه على قدر
وإذا بيكون فيه تنسيم للبخار بين القدر والمشخال
نسده بعجين نسويه عشان مايتسرب البخار
وحتى الغطاء إذا مايركب صح نسد الفتحات بالعجين

مانرصه كله في القدر
نرص في كم وحدة عشان القلي

بعد الرص مانحط على النار على طول
إنما نخليه على جنب مدة عشرين دقيقة
بعد العشرين نحط القدر على النار المتوسطة
بعد عشرين دقيقة على النار بيكون الشغل جاهز

قبل ماتنتهي العشرين دقيقة
نجي للي حق القلي
بمقلاة فيها زيت قليل
نقلي العجين المحشي بالخضار
كذا بس نقلبه عالسريع لأنه على طول يستوي
بعد مانخلص نركنه على جنب ونطلع اللي في قدر البخار
بنلقى الماندو الكوري جاهز ومنفوش وياسلام سلم

وهذا المقلي :

وهذا الكوري ممبسوط منها

بالنسبه للحشوه موشرط تكون تونه

انتواومذاقكم تونه ولادجاج اولحم مفروم
بس لازم تحمسونه بعدهاتضيفون الخضارليتمازجون