(( سجل حضورك في بيت شعري ))

[الحــزن عــادة]

يضيق صدري كل ما هبت علي من الجنوب
نسايم(ن) ما ملت طعوني وقلبي ملها

وارقى على مرقاب حزني واتحرى للغروب

وامسك جدايل هالحياه المجبله وافلها

واشوف وشلون الليالي ادور فالوقت اللعوب

واجمع مسائل هالبشر في دفتري واحلها

والعن ابو الحظ الردي واستغفر المولى واتوب

واقول ياربي تعين اللي صبر ثم شلها

ويا سعود قربلي مدام الوقت والعمر محسوب

واسمع ياخوك ابيات من جوفي نويت اتلها

لاصارت الدعوه ما بين ضلوع صدري والهبوب

اقولها واللي عقد روس الحبال يحلها

وش عاد نرجي من زمن صارت به كبار الذنوب

انك على الباطل سيوف الحق تنوي سلها

إسلامك اصبح متهم والنور غيب ومحجوب

دروبهم ياكثرها ودروبنا يا قلها

خوينا تصلاه نار الكفر ونشوفه يذوب

وحنا انترجى من عجوز الغرب ترهي ضلها

لا عاد به فزع ولا غيره وحيلتنا يادوب

نسجد ونستنكر عساها تنسمع او علها

صارت التنافس بالطرب من اولويات الشعوب

الغانيه صفق لها والراقصه طبلها

والموضه تحاصر تقاليد العرب من كل صوب

وتفوح دلتنا زعل واعوانهم تزلها

والكل منا يشوف نفسه للتخاذل امغصوب

حلوقنا ماتت عطش يالله طلبتك بلها

يالله سترك من اعلوم(ن) في خواطرنا اتجوب

رحماك سهلها علينا دقها مع جلها

ياسعود إخذها من نمط حكٍ على إلسان القلوب

اربع نصايح إلـ حياتك يا عسى توصلها

المرجله هي البلد وافعال يمناك الدروب

والأدمي يولد غريب ولا تسنع دلها

والكايده تبغى ولد ماهو طماع كذوب

والرابح اللي نفسه لربه قدر يدلها

وترى الكرم عند العرب يغطي الاف العيوب

وانك بخيل اتساوي عيوب العرب ذي كلها

واحذر تحسب كل بير بدنيتك به ماء شروب

واذا تجاهلت العذوال بتموت بظلها

وانا بودع راس مرقابي اذا حل الغروب

وبقول ياربي تعين اللي صبر ثم شلها




..؛..( الحــــزن عـــــادة )..؛..